البيكاتا بالشامبنيون

موضوع: البيكاتا بالشامبنيون 29/9/2008, 21:12

طبعا لازم اتأكد الأول من كل حاجه عندي ولا لأ . . المقادير دي بتكفي تقريبا من 4 ل 5 أشخاص .

المــقادير ::
• كيلو لحم بتلو مقطع شرائح .. تقريبا بيطلعلي 15 شريحة في المتوسط ,
• كوباية و نص عيش غراب (شامبنيون) تقريبا 150 جرام و بيبقا متقطع شرايح و بيتباع جاهز

• كوباية دقيق
• 4 معالق كبيرة زبدة

• نص كوباية كريمة لباني او ما يسموها كريمة طبخ cooking cream تباع في السوبر ماركت بقسم الالبان
• بصلة مفرومة

• ملح و فلفل

• فلفل أبيض

الطريقة ::

الفكرة في البيكاتا ان المكونات بتاعتها كلها بتكون فيها طعم واحد و دا هيبان من طريقة العمل بتاعتها .
• بنغسل اللحمة كويس , و نتبلها بملح و فلفل و مية البصل ( بنحط ملح و فلفل على كل اللحمة حسب مقدار كل واحد ما بيحب الملح , و بنعصر البصل المفروم عشان ينزل المية بتاعته على اللحمة و نقلبهم على بعض ) و نسيبها 10 دقايق تقريبا عشان تكتسب طعم التتبيلة .

ممكن نعصر في الأول على اللحمة لمونة علشان زيادة النظافة و كمان بتقلل نسبة الكوليسترول في اللحم , و مش بتأثر على الطعم خالص متخافوش
• بعد كدا بنجيب نص كوباية الدقيق أو اكتر شوية و نحط فيها اللحمة , ممكن نزود شوية دقيق كمان للحمة لحد ما تتشرب الدقيق , و تتغطي بيه كويس

• نجيب معلقتين زبدة و نحطهم على النار ,
• دلوقتي احنا هنشوح اللحمة , قطعة قطعة نحمرها من الجنبين , و هنلاقي احيانا الزبدة بتقل ممكن نزود زبدة شوية برضه , بس منحطش كتير , و هنلاقي لون اللحمة بني فاتح يبقا كدا معناه انها اتشوحت .
• نجيب طاسة تانية و نحط فيها معلقة زبدة و نضيف عيش الغراب و نقلبة لمدة 5 دقايق .
• و بنطلعة من الطاسة .
• في نفس الطاسة نجيب اخر معلقة زبدة نحطها و نحط عليها معلقتين دقيق و نفضل نقلب الدقيق لحد لما يبقا لونة دهبي , ناخد بالنا انه ميتحرقش

• نشيله من على النار و نضيف كوباية مية و مقدار الكريمة و نقلبهم على بعض ببطئ عشان يبقا قوام سميك .
• نحطه تاني على النار و نفضل نقلب ( الخطوة دي مهمة ) بنفضل نقلب لحد ما يغلي , النار لازم تكون متوسطة , و مع التقليب المستمر عشان ميعجنش ,
• لو لقيتيه هيعجن ممكن تضيفي نص كوباية ميه ((دافيه)) مش ميه من الحنفية .
• أول ما يغلي نجيب عيش الغراب و نحطه عليه و نحط اللحمة نوطي النار و برضه نقلبه لمدة 5 دقايق (التقليب عشان الخليط يبقا سايح و ميعجنش) و لو لقيناة هيعجن برضه بنفس الطريقة نحط نص كوباية ميه دافيه ( مش من الحنفية)
• و احنا بنقلب نحط الملح و الفلفل ( دايما الملح و الفلفل في أي أكل حطيه في الآخر عشان الأكل يحتفظ بقيمته و طعمه )
• أول ما الصلصة تغلي مع عيش الغراب و اللحم نطلع اللحمة في طبق التقديم و نصب عليها الخليط و تتقدم سخنه

• ممكن عشان التقديم نحط فروع من البقدونس ..

طبق البيكاتا بيقدم دوما مع طبق ارز ابيض , او نفس الطبق نصفه يكون ارز ابيض و النصف الثاني خلطة البيكاتا مع الصوص اللي عملناها

ملاحظة : اذا لم تتوفر الكريمة اللباني او ال cooking cream ممكن اسبدالها بكوب حليب عليه معلقتين ثلاث طحين ( دقيق ) مع التبهير اللازم الي اخر بقية الوصفة ..

و بالهنا و الشفا

موضوع: رد: البيكاتا بالشامبنيون 29/9/2008, 21:29

يا سلام يا سلام
بالصور كمان
تسلم الايادى
ربنا يخليكى للبنات كلهم

ميرسى

زائر

يا اكلات يا فراوله

جوعتيني بجد

ميرسي ليكي يا جميل