يوميات مدرسه أجن من الطلبة ( و ابتديت اضرب )

هذة القصة من لخيال الواسع اللي جوة
(واحتما تكون حقيقه ليا عن قريب وربنا يستر بقى)

يلا


بسم الله الرحمن الرحيم



أنا مدرسة كمبيوتر

و الشغلانة النكد دى باشتغلها من ساعة ما اتخرجت يعنى من 3 سنين تقريباً

و للأسف السنة دى روحت أشتغل فى مدرسة جديدة غير مدرستى اللى كنت بادرس فيها للأطفال الصغننين

المهم انى فى المدرسة دى لما قروا الابلكيشن بتاعى و عرفوا انى دارسة فيجوال بيزيك
( الهى كنت انشكيت فى دراعى قبل ما اكتب كدة )

و المصيبة بقى ان البرنامج ده المنهج الجديد بتاع حبايب قلبى ملائكة الأرض 3 اعدادى

و طبعاً لما صدقوا لأن ما حدش فى المدرسة درس البرنامج الزفت ده قبل كده ففرحوا قوى و قالولى انتى بقى تدى 3 اعدادى

يا ناس يهديكم يرضيكم ده انا طول عمرى بادى العيال الصغيرة

لأ ده العيال هنا فى منتهى الرقة و الوداعة زى النسمة
( ربنا ما يوريكم )

و للأسف وافقت ( و دى كانت غلطة عمرى )

و دخلت الفصل فى أول حصة ليا و كانت حصة صبيان

دخلت لقيت قدامى 40 شحط أطول و اعرض منى و فيهم اللى بشنب و دوجلاس كمان

و العيال بيبصوا لى بصات غريبة مرعبة
زى بصات ريا و سكينة

كان اللى ناقص انهم يجيبوا المنديل و يا اختى عليها يا اختى عليها

و الله العظيم لولا ان قعدة البيت ممله كنت جريت و سبت المدرسة تولع بيهم

بس انا ما باحبش برضه استسلم بسهولة

المهم شمرت و قولت استعنا على الشقا بالله

و ما حدش بياكلها بالساهل

و قوينا على الشر يا رب

و ابتدت المعاناه ......................

حصة احتياطى

انا مش عارفه هما عايزين منى ايه ؟
لسه نازلة من حصه من عند البعدا اللى ما يتسموا و يادوب هاريح بقى لقيت المشرفه فى قفايا
حصة احتياطى ياميس
نعم حصة ايه ؟
احتياطى اصل مستر محمد عبد الله مراته اختها بتولد و راح يوديها المستشفى
طب يا حبيبتى ربنا يقومها بالسلامه انا مالى بقى
يا ميس ما هو عنده حصه و لازم حد يدخلها
طب ما أى حد يدخلها اشمعنى انا ما تشوفى حد من مدرسين العربى زمايله يدخلها على الأقل يدى العيال الدرس
لأ مافيش حد فاضى
يعنى مافيش حد بتاع عربى فاضى فى المدرسة كلها
بصى يا ميس مستر حسن قال ان حضرتك اللى هاتدخليها
عملها فيا سحس بمب
يا بنتى يهديكى يرضيكى لسه طالعه من حصتين زفت اعدادى
مش هاينفع و الله يا ميس و بعدين بلاش تعملى مشاكل معاه
و الحصة دى بقى سنه كام
رابعه ابتدائى
رابعة ابتدائى اه عيال يعنى
اه يا ميس و فصل هادى قوى
دخلت الحصة طبعا و انا رجلى فوق رقبتى
العيال اول ما شافونى الميس بتاعة الكمبيوتر اهيه
امال مستر محمد فين يا ميس
غايب
لا يا ميس ده كان موجود الصبح
روح يا حبيبى عنده ظروف و روح
طب مش كان يقول
معلش نسى ياخد الاذن من سيادتك اترزع بقى
حاضر
بصوا يا سنه رابعه خلوها حصة حلوة و خلوها تعدى من غير ما انكد على حد فيكم اللى عايز يكتب واجب ناقص له يكتبه اللى عايز يطلع ياكل ياكل و اللى عايز يشرب يشرب بس مش عايزة صوت ماشى
حاضر يا ميس
بس العيال ابتدوا صوتهم يطلع
و انا قاعده على اول ديسك مش قادرة ازعق حتى
بس يا ابنى انت و هو مفيش فايده يا بت اتهدى و بطلى كلام و لا حياة لمن تنادى
المهم قولت اهى حصة استحملها و خلاص و بينى و بينكم كنت مزعقة كتير فى الحصة اللى فاتت فماكنش فيا حيل
المهم فضلوا يتكلموا كده بتاع ربع ساعه لغاية ما لقيت مدرس بيفتح عليا باب الفصل
هو الفصل ده ما فيهوش حد و لا ايه ؟
ايوة يا مستر خير
يا ميس مش عارفين نشتغل
ليه ؟
الصوت يا ميس مش عارف اشرح حاجه
خلاص يا مستر سورى انا هاسكتهم
يا ريت
يعنى انا ادخل اعدادى العيال تتكلم انزل ابتدائى العيال تتكلم ابتديت احس انى مدرسة فاشلة
لأ مش ممكن استسلم لهم بسهولة كده
روحت مقومه البنت اللى فى اول ديسك
انزلى المعمل هاتى لى الخرطوم
البنت نزلت و طلعت بيه
و العيال زى الكلاب اول ما شافوه اتكتموا
على الله بقى اسمع صوت حد فيكم يا سنه رابعه مفهوم و على الله حد يقول لى تويليت او اكل او شرب هايبقى يومه مش فايت اللى هايطلب حاجه هاينضرب و اللى هايشتكى من حد هاينضرب
يا ريت بقى ما حدش يتفزلك و يقولى ما استغلتيش الحصة ليه فى حاجه مفيده
تعالوا اقفوا 5 حصص ورا بعض بتشرحوا و تشتغلوا عملى و تكتبوا على الكمبيوتر و تيجى الحصة الفاضية اللى لسه بعدها هادخل حصة اعدادى كمان و تجيلى حصة احتياطى و يبقى مطلوب منى اكون فريش و اتعامل مع العيال بالراحه و بعدين ما انا كنت كويسة معاهم بس هما اللى قلوا بأصلهم معايا
المهم وقفت لهم تلت ساعة و انا مش عايزة اتحرك من قدام البورد و هما باصين لى و خايفين ينطقوا
لغاية ما لقيت بنت بتعيط فجأه
مالك بتأوأى ليه
مفيش
مفيش ايه مالك يا بنتى انطقى
يا ميس مفيش حاجه خلاص
يا بنتى يا تتكلمى يا تبطلى عياط مش ناقصاكى الحكايه انتى كمان
حاضر هابطل عياط و هى بتعيط برضه
استغفر الله العظيم من كل ذنب عظيم حد عارف البت دى بتعيط ليه
اه يا ميس انا عارفه
ليه يا حبيبتى
اصلها عايزة تروح التويليت و خايفه تقول لحضرتك لحسن تضربيها
ايه ده هو انا اتغبيت قوى كده
( حسيت انى شديت عل العيال جامد )
طب ما تقولى يا حبيبتى
يا ميس ما حضرتك قولتى هاتضربى اللى عايز يروح التويليت
لا يا حبيبتى خلاص روحى
شكراً يا ميس
سنه رابعه لو عايزين تاكلوا او تشربوا اتفضلوا مش مشكله بس المهم ما يطلعش صوت اوكى
ماشى يا ميس
و لسه هاقول يا هادى لقيت سحس بمب بيفتح الباب
فى ايه يا ميس
خير يا مستر
البنت اللى لسه طالعه من الفصل دى بتعيط ليه
مفيش حاجه يا مستر
مفيش حاجه ايه و بعدين ايه اللى فى ايدك ده يعنى حضرتك تدخلى حصة احتياطى تقومى تضربى البنت لحد ما تعيط
حضرتك شوفتنى باضربها
لأ بس هاتعيط ليه و بعدين الخرطوم اللى فى ايدك ده بيعمل ايه معاكى
ما بيعملش يا مستر اصل المعمل كان فاضى و هو بيخاف يقعد لوحده فطلع ورايا
افندم حضرتك بتهزرى ضاربه بنت و بتهزرى
يا مستر قولت لحضرتك ما ضربتهاش
و لسه هاكمل و هازعق لقيت البنت جت من التويليت
انا ضربتك يا حبيبتى
لأ يا ميس ما ضربتنيش
ما تخافيش يا ماما لو الميس ضربتك قولى
لأ يا مستر ما ضربتنيش و الله
امال كنتى بتعيطى ليه
اصلى كنت عاوزه اروح التويليت
طب و فيها ايه
اصل الميس قالت ما حدش هايروح
ليه كده يا ميس
يعنى الراجل ده عايز يلبسنى مصيبة و خلاص
كنت معقباهم يا مستر عشان بيتكلموا
و هو العقاب بيبقى بالطريقة دى
مستر انا من ساعة ما دخلت المدرسة دى و انا باتعامل مع تيران اعدادى فماتجيش حضرتك دلوقتى و تدخلنى حصة ابتدائى و عايزنى اتعامل مع العيال عادى انا اساسا نسيت التعامل مع الاطفال بيبقى ازاى
و هى دى مشكلتى انا يا ميس
لأ يا مستر مش مشكلتك مشكلتى انا حضرتك عايز منى حاجه تانى
لأ شكرا بس بالراحه شويه على العيال
حاضر
المهم بقى انى كان نفسى امد ايدى عليه اقوله و انت مالك يا حشرى يا رخم يا رذل اديله نص و هو خارج من الفصل اعمل فيه اى حاجه بس ما ينفعش ما هو الناظر برضه و ليه برستيجه فى المدرسة الهى ينشك فى برستيجه البعيد .
تانى يوم داخلة حصه اعدادى
لقيت ولد جاى يقولى ايه اللى عملتيه ده يا ميس
عملت ايه
اللى عملتيه مع رحمه
رحمه مين يا بنى ادم
رحمه اختى
اختك . طب و انا مالى باختك
مارضيتيش توديها الحمام لحد ما عيطت حرام عليكى يا ميس دى عيله صغيرة
و انت مالك يا رذل
مالى ازاى اختى يا ميس
اختك فى البيت يا حبيبى لكن هنا انت وهى تاخدوا بالجزمة
طب على الله اختى تيجى تقوللى انك ما وديتهاش الحمام تانى
على الله ايه ؟
البت يا ميس كانت هاتموت و بعدين انا قولت لها الميس ما بترفضليش طلب يعنى لو كانت عرفت انك اختى كانت هاتوديكى على طول
ده بأمارة ايه ان شاء الله تكونش من بقية اهلى
لأ بأمارة انك بتحبينى
لأ مش باقبلك
بس برضه هاتوديها ماشى
ادخل جوه بدل ما اضربك بقى انا كل ده واخده الكلام بهزار ما تخلنيش اقلب عليك
ماشى هادخل بس اوعى تهزى صورتى قدام البت
بعد كده كنت فى المعمل و لقيت البنت عندها حصة كمبيوتر
بقى انتى رايحه تشتكى للحمار اخوكى
لا يا ميس و الله ده مستر حسن كان بيسالنى كنت باعيط ليه قدامه فحكيت له
منك لله يا سحس بمب
طب ماشى
باقولك يا ميس هو انا ممكن اروح الحمام
نعم
اصل اخويا قاللى قولى للميس و هى مش هاترفض هو انا اللى باديكى الحصة
لأ
طب قولى للميس اللى عليكى
فراحت للميس اللى عليهم يا ميس ممكن اروح الحمام
روحى يا رحمه
لأ بعد اذنك يا ميس مش هاتروح ابقى أوأى بقى و اشتكى لعنتر فجله بتاعك اترزعى مكانك يا بت

سحس بمب




من يوم ما اشتغلت فى المدرسة و من اول يوم لي

و انا مش مرتاحه للراجل الناظر ده و لا بلعاه


و زى ما بيقولوا كده من القلب للقلب واضح انه هو

كمان ما بيحبنيش

مشكلة الراجل ده ايه بقى
انه عايز يرسم نفسه على الكل العيال و المدرسين

و كل اللى شغالين فى المدرسة
و انا سمى و موتى اللى يتنطط عليا

حاولت كتير افهمه ان لو كان هو قرد فانا مش

شجرة


لكن ما كانش بيقتنع

كان دايما شايف نفسة و عامل فيها حاجه و هو

مالوش فيها و الله العظيم


ده حتى العيال كانوا عاملينه تريقتهم بسبب انه

بيتحشر فى كل حاجه اللى فاهم فيه و اللى مش

فاهمه

بس كل المدرسة بقى كوم و انا كوم تانى


يتحشر فى شغل الكل لكن يجيى لحد عندى بقى و

ستوب
لكن تقول لمين كان عامل زى القطر ما بيفرملش


المهم ان فى يوم داخله حصة بنات ما لقيتش اربعة

من الفصل موجودين


هما نورهان و منه و رضوى و سلمى ماجوش

النهارده

ما حدش رد

ما تنطقوا هما غايبين


لأ يا ميس رضوى بس اللى غايبة


و باقى الهوانم فين ان شاء الله

فى الفصل التانى



بيهببوا ايه فى الفصل التانى اتنقلوا


لأ بيحضروا حصة علوم


بيحضروا حصة علوم و النبى . ماشى يا سنه تالته

ثانية واحده بس و راجعه لكم


دخلت الفصل التانى و اول ما شافونى حطوا وشهم فى الأرض


بعد اذنك يا مستر حضرتك عايز الهوانم


لأ يا ميس دول قالولى ان حضرتك مش هاتديهم حاجه النهارده


مش هاديهم ليه ده احنا لسه فى اول التيرم قومى فزى يا ماما انتى و هى


قاموا التلاته ورا بعض


دخلت الفصل جايين يدخلوا ورايا


رايحين فين


مش هاندخل


لأ تدخلوا فين اتلقحوا هنا على ما اخلص و افضى لكم وهبدت الباب و جيت اكمل شرح


لقيت الباب بيتفتح و المحروس واقف لى معاهم على الباب


لو سمحتى يا ميس


لأ


هو ايه اللى لأ


مش حضرتك عايز تدخلهم الفصل لأ


لأ ليه


هو حضرتك عرفت هما عملوا ايه


اه و هما هايعتذروا لحضرتك و دى اخر مرة


لأ


لأ برضه يا ميس


أيوه لأ مش هايدخلوا و هايبقى يوم اسود على

دماغهم ان شاء الله و مش هايحضروا لى حصص بعد كده


يعنى ايه


يعنى زى ما قلت


بس كده ما ينفعش يا ميس


مستر حضرتك بتعطلى الحصة عشان شوية جزم


يا ميس لو سمحتى من غير غلط


لأ هاغلط و هاديهم على دماغهم كمان


يا ميس بلاش التحدى ده


مستر بعد اذنك عندى حصة و على الله حيوانه فيكم تفتح باب الفصل و روحت هابده الباب فى وشه


انتى بتهبدى الباب فى وشى ماشى يا ميس ماشى يا ميس


العيال كلها بصوا لى و تنحوا


ميس


نعم


احنا هاناخد حاجه النهارده


اكيد امال هانضيع الحصه يعنى


طب حضرتك بس ما تزعليش نفسك


انتى شايفانى باعض فى الأرض و لا باشد فى شعرى


لأ ما تزعليش بس من مستر حسين ده راجل اهبل


من غير غلط عيب كده


انا قصدى يعنى ما تضايقيش نفسك علشانه


خلاص ما حصلش حاجه طلعوا الكشاكيل و
ابتديت اديهم الحصة


شويه و لقيت الباب بيتفتح تانى


و فيه مستر طوله مترين واقف على باب الفصل و البنات معاه


خير يا مستر

يا ميس هما جايين يعتذروا لحضرتك


مش هاينفع يا مستر


لأ يا ميس هاينفع


باقول لحضرتك مش هاينفع


عشان خاطرى طيب


استغفر الله العظيم . يا مستر دى عيال قليلة الأدب و مش متربيه


يا ميس خلاص حقك عليا انا اعتذروا للميس


حضرتك مش واخد بالك ده انا لسه متخانقه مع مستر حسين بسببهم


هو كان بيزعق بسببك

اه

يعنى حضرتك اللى هبدتى الباب فى وشه

ايوان

حرام عليكى يا ميس ده صعبان عليه منك قوى و عمال يقول تهبد الباب فى وشى ازاى دى قد بنتى


يا مستر ما هو غاظنى . على طول بيدافع عنهم


طب معلش دخليهم دلوقتى و ابقى صالحيه بعد الحصة


اصالحه

يا ميس ده راجل كبير و مخه على قده


ربنا يسهل

طب البنات ممكن يدخلوا بقى


اوكى مش مشكله بس على الله تعملوا كده تانى مش عايزين تحضروا استأذنوا منى و غوروا فى ستين داهيه بعد كده لكن ما ادخلش تانى و ما الاقيكوش فاهمين


احنا اسفين يا ميس اخر مره و الله بس اصل الدرس كان صعب و الله و مكناش فاهمينه خالص


كملت الحصة و بعد ما خرجت لقيت ولد من اعدادى قدامى


ايه اللى عملتيه ده


ايه


سحس بمب هايطق منك


هو ماشى يسيح لى


لأ ما احنا سمعنا كل حاجه ده دور اعدادى كله سمع اللى حصل


لا يا راجل و ايه رأيك بقى


رأييى . دى هبدة الباب هزتنا فى الفصل . بالراحه شويه يا ميس المدرسه قديمه


طب خلاص روح على حصتك بقى


ماشى بس حاسبى لحسن يستناكى بره


احترم نفسك و روح على فصلك


ماشى يا جامد


لسه بالتفت لقيت ولد تانى


الباشا الكبير و المعلم بتاعنا اللى مثبت سحس بمب و اللى اتخن من سحس بمب


الله باشا و معلم هو انا مدرسه و لا باتاجر فى المخدرات


لأ جامده منك دى ده انتى كان ناقص ترزعيه بالقلم على وشه


خلاص بقى خلصنا


بس بيقولوا هاتترفدى الكلام ده صح


هو انا حد يقدر يرفدنى


يرفدوكى ده احنا نقفلها لهم انتى فاكره ما وراكيش رجاله و لا ايه ؟


ماشى يا حامى الحما روح على فصلك بقى


نازله المعمل لقيت زمايلى بيبصوا لى


فى ايه انتوا كمان

مافيش

لأ فيه

انتى ايه اللى عملتيه فى مستر حسين ده


يوووووووه هو انا ما واريش حاجه النهارده غيره


ده نزل حكى لنا و كان هايعيط حرام عليكى


هو انا عملت له حاجه


تهبدى الباب فى وشه قدام البنات و تقولى عملت له حاجه


طب هاعمل له ايه دلوقتى


اطلعى صالحيه ده كان متأثر قوى


ماشى انا برضه حاسه انى زودتها معاه ده العيال كلها بيقولوا لى ايه اللى عملتيه ده


هما العيال كمان سمعوا اللى حصل


هما العيال بس ده اعدادى كله عرف


لأ بجد بقى صالحيه ده راجل قد باباكى الله يرحمه


خلاص هاطلع له


جايه اطلع له لقيته فى وشى و بيبص لى و عامل نفسه زعلان


روحت ضحكت له ببراءه و قلت له بص بقى


قالى قبل ما تقولى اى حاجه على فكرة انتى غاليه عندى و ما كنتش متوقع تعملى معايا كده ده انا باحبك زى بنتى


يا مستر و الله انا كنت متنرفزه بسبب اللى عملوه بس حقك عليا


لأ يا ستى حقك انتى عليا عشان شخطت فيكى قدام العيال و تعالى اطلعى معايا الفصل


ليه


تعالى بس


دخلنا الفصل راح مطلع البنات التلاته


اعتذروا للميس يا بنت انتى و هى


احنا اسفين يا ميس


الميس عندى اهم منكم كلكم و على الله حد يزعلها تانى انتوا فاهمين و لو عايزه تعملى لهم استدعاء ولى امر كمان هاعملهم يا ميس


لأ خلاص يا مستر


المهم انك تكونى مش زعلانه


لأ زعلانه ايه ده حضرتك احرجتنى بذوقك و الله




المشكلة بقى انى لحد دلوقتى مش عارفه الراجل ده عايز منى ايه انا اتأكدت بعد الموقف ده انه سايكو رسمى من شويه يزعق لى و يشخط فيا و بعد كده يشتكى منى لطوب الارض و شويه و يعتذر لى يكونش عايز يجننى




المهم انه بعد الموقف ده شويه يكون كويس جدا معايا و يتعدل على الاخر و انتى احسن مدرسه عندى




و بعد كده الاقيه بينصر العيال عليا



بجد الراجل ده لخبطنى خالص ربنا يهديك يا

سحس

حصة الألعاب

مبدئيا كده انا مش ضد حصص الألعاب و لا مدرسين الألعاب
بس من يوم ما جم مدرسات التربية الرياضية العملى و انا ما عرفتش ادى حصة على بعضها من غير خناقات و مشاكل
ليه بقى
الجدول من ساعة ما شرفوا فى المدرسة اتغير و بقت حصة البنات فى معاد حصة الكمبيوتر بتاعة الصبيان
حد يقوللى و دى فيها ايه
فيها كتير فيها ان الفصل بتاع الصبيان بيبص على ملعب المدرسة و من هنا ابتدت المشاكل
انا دخلت الحصة لا بيا و لا عليا و ابتديت اكتب الدرس لقيتهم ساكتين مش طالع لهم صوت و دى طبعا حاجه غريبة و خصوصا و انا مدياهم ضهرى اذا كانوا ما بيعملوش كده و انا باصة لهم
المهم قلت ابص لهم فجأه اشوفهم بيعملوا ايه
بابص يا مؤمنين لقيت الفصل كله مرمى على الشباك اللى فى اخر الفصل
هما شوية عيال بس اللى بيكتبوا و الباقى كلهم عند الشباك ما نطقتش و لا كلمة و عملت للعيال اللى قاعده هس و روحت واخده الخرطوم و دورت فيهم كلهم الضرب
و قولت لهم اطلعوا لى بقى عند البورد
طلعوا كلهم عند البورد
ايه اللى كنتوا بتعملوه عند الشباك
ما كناش بنعمل حاجه
انطقوا و قولوا كنتوا بتعملوا ايه احسن لكم
يا ميس و الله مافيش حاجه خلاص احنا اسفين
لا و الله ما هاعديها بالساهل كنتوا بتعملوا ايه يا متخلف منك ليه
العيال برضه ساكتين
يعنى مش عايزين تنطقوا خلاص اروح اشوف انا
لقيت حصة الألعاب بتاعة فصل البنات شغاله
يا ولاد اللذين انتوا كنتوا بتتفرجوا على زمايلكم
لأ يا ميس بنتفرج ايه دى كانت فيه خناقه فى الملعب
لا يا راجل
اه يا ميس ده مستر محمد كان بيزعق للعيال فاحنا قمنا نتفرج
و الله
اه يا ميس
و كلكم بقى سمعكم ميه ميه و انا الوحيده اللى انطرشت مش كده
ليه يا ميس
يا واد ما انا واقفه معاكم فى الفصل من بدرى تقدر تقوللى الخناقه دى حصلت امتى
و حضرتك بتكتبى
يا سكر و انا باكتب مش كده
ايوه
جتك اواه اتركن لى يالا انت و هو على جنب هاكتب و افضى لكم
و كتبت الدرس و دول واقفين شويه يهزروا و شوية يتكلموا و شوية يرخموا كعادتهم يعنى
خلصت انا كتابة و شرحت الكلمتين و بصيت لهم
رجاله انتوا قوى و قاعدين تبصوا للبنات مش كده
قعدوا يضحكوا برخامه
طب ماشى يا دكر منك ليه اقلع الشوز يا زفت منك ليه
نعم
نعم الله عليكم بصراحة مش لاقيه لكم عقاب تانى
و نتعاقب ليه اصلا
مش سايبين الحصة و بتبصوا على البنات
ما كناش بنبص عليهم
يا راجل
ايوه و بعدين احنا هانبص على الأمله يعنى
احمد كانوا بيبصوا و لا لأ
اه يا ميس كانوا بيبصوا
اهوه صاحبكم و عارف كل بلاويكم
ايوه و قلت لهم اقعدوا الميس واقفه قالوا مش قاعدين هى هاتعمل لنا ايه يعنى
كده يا احمد طب ابقى اشتم تانى فى اى حد من المدرسين و الله لاقول
لأ ثوانى بقى الموضوع اتقلب بقى قلت له الميس واقفه قالك هى هاتعمل ايه يعنى
اه قاللى كده
كده يا خالد
يا ميس ده واد ابن جزمه كداب
ايه يا نهارك اسود ايه الألفاظ دى يا زفت
يا ميس ما هو بيوقع بينى و بينك و انتى عارفه انى باحبك
بتحبنى ايه و نيلة ايه ايه اللى انت قولته ده
مامته صاحبة مامتى و ما بيزعلش منى
انت راضى يقول على مامتك كده
خلاص يا ميس
خلصت روحك منك ليه لو انت راضى كده على مامتك فانا مش راضيه و روحت ضاربه الواد خالد الموضوع كده بقى مقرف قوم يا ابنى انده لى مستر حسين ( سحس بمب )
حاضر يا ميس
ييجيى بقى الناظر يتصرف معاكم يجيب لكم جوابات رفد يشوف هو هايعمل فيكم ايه لانى زهقت خلاص
دخل سحس يتمختر و فى ايده حتة عصاية مالهاش لزمه
خير يا ميس
البهوات قاعدين يبصوا على البنات من الشباك و انا باكتب
ايه ده ازاى تعملوا كده و راح يبص من الشباك ( اه دى حصة الالعاب شغاله )
يا مستر
نعم يا ميس
تعالى اقولك لو سمحت البيه ده بيشتم صاحبه كمان بمامته
ايه قاله ايه
قاله يا ابن الجزمة
يا نهار اسود انت قولت كده يا خالد
انا اسف يا مستر
اسف ايه ازاى تعمل كده و بعدين انت معاك كشكول و لا لأ
كشكول ايه ؟ الراجل ابن المجنونه باقولة العيال بتبص على البنات و بيشتموا بعض و ده يقوله كشكول
اه معايا كشكول
طب ادخل وريهولى
حاضر
و انتوا كمان ادخلوا ورونى كشاكيلكم
يا نهار اسوح يا ريتنى ما ندهتلك يا بمب
يا مستر انا نادهه حضرتك عشان موضوع تانى خالص
ما انا عارف يا ميس ثوانى بس
يا نهار مش فايت
اتفضل يا مستر
ورونى كشاكيلكم و مين مش عامل الواجب
واجب ايه منك لله يا بعيد احنا فى ايه و لا فى ايه
هو مش كان فيه واجب يا ميس
اه يا مستر
( ربنا ينتقم منك يا بعيد على هبلك اللى ما حصلش )
طب عاوز اشوفه يا سنة تالته و ابتدى يعدى يشوف الواجب و يوقف اللى مش عامل الواجب
و انا واقفه مفروسه
لقيت الواد اللى قاعد قدامى بيقولى احسن عشان قولت لك ما تندهيش سحس اهو هايبوظ لك الحصة و انتى كنتى طالعه طلعه جامده قوى و كنتى لسه هاتقلعيهم الجزم
طب اعمل ايه
هاتعملى ايه يعنى انا اعرف . المهم انا مش عامل الواجب لو جه يكلمنى هازعل منك قوى
يا اخى اتنيل دلوقتى خلينا فى الراجل اللى هايجننى ده
ايه ده يا ميس دول مش عاملين الواجب
يا سلام
اه يا ميس 5 بس اللى عاملين الواجب
كده برضه يا 3 / 1 ماشى
لا يا ميس دول لازم يتعاقبوا
اللى تشوفه يا مستر
انا اللى هاضربكم بقى هى الميس عشان طيبه و ما بترضاش تزعلكم تعملوا كده برضه
طب يا مستر ما تسيب لى انا الموضوع ده انا هاضربهم
لا احنا عايزين مستر حسين هو اللى يضربنا
بعد اذنك يا ميس انا اللى هاعاقبهم
و راح رايح بالبتاعه الهبلة اللى فى ايده و ضرب كل عيل ضربه خليتهم مسخسخين من الضحك بسببها و انا واقفه حاسه ان ضغطى على و دماغى هاتولع
و بعد ما ضربهم . اى خدمه يا ميس و كل حصة انا اللى هادخل افتش على الواجب .
و العيال بتضحك برضه و خرج من الفصل
بصوا معايا يا شباب
قاعدين بيتكلموا برضه
يا رجاله . هانقول كلام حلو مش هانشرح حاجه
العيال كلها سكتوا
دلوقتى عيب نبص على البنات و هى بتجرى و تنط و تلعب انتوا مش عندكم اخوات بنات ترضوا حد يتفرج على اخواتكم
يا ميس احنا ما كناش بنبص على البنات و الله
هانكدب تانى
لا والله بجد احنا كنا بنبص على ميس مها
مها مين
بتاعة الالعاب الجديدة ام عيون خضرا
يا راجل
اصلها صاروخ يا ميس
احترم نفسك يا زفت
بس يا واد يا عمر صاروخ ايه ما تزعليش يا ميس حضرتك احلى
و النبى هو انا غيرانه يا متخلف انت
امال ايه طيب
يا ابنى عايزاكم تحترموا نفسكم بدل ما اقلب عليكم و اخليها سنه سوده على دماغكم
اه و تندهى لنا سحس مش كده
لا يا حبيبى مش كده و انا انده سحس ليه ما انا انده الخرطوم احسن و هو يتصرف معاكم
انتى على طول كده يا ستى ما تزعليش خلاص مش هانبص تانى
طب الهى اللى يبص تانى ينشك فى نن عينه قادر كريم
بعد الشرعلينا
اخرسوا جتكم القرف