سؤال جه على بالى نتيجة اشاعة طلعت عن تغير وزارى مرتقب وهو
ياترى مين هى الحكومة الجاية ؟؟؟هاتكون برده رجال أعمال ولا أساتذة جامعة ولا مجرد ناس محظوظة رماها القدر فى هذا المنصب بالصدفة
نظيف
رئيس الوزراء
بيقولوا انك حاولت تعمل حاجة كويسة فى البلد .. بس بصراحة أنا ماحستش بحاجة
حد فيكم حس بحاجة ؟؟؟
رشيد محمد رشيد
وزير التجارة الخارجية والصناعة
هو انسان فعلا هادئ و محترم جدا على المستوى الشخصى
ويمكن علشان هو مش ابن سوق ولبط زى مابيقولوا ماعرفش يظبط السوق
عشنا فى عهدك أقوى موجة لارتفاع الاسعار ..وأرجوك ماتقولش الاسعار العالمية أكيد كان فيه 100 حل
لأنك وصلتنا أننا بقينا نترحم على أيام التسعيرة
بس ماحدش هاينسى اللى عملته وانشائك لجهاز حماية المنافسة ومنع الاحتكار وجهاز حماية المستهلك
ونتمنى أن اللى يجى بعدك يعرف يفعل دورهم
محمود محيي الدين
وزير الاستثمار
مهما عملت ماحدش هاينسى ان فى الفترة اللى مسكت فيها قدرت تبيع أكبر عدد من شركات القطاع العام
الجاهزة هدايا لرجال الأعمال اللى بقوا يتحكموا فى قوت الشعب
بدل لما تشجعهم انهم يبنوا مصانع جديدة ويعملوا شركات جديدة تزود بيها الانتاج
صدقنى لو كنت عملت كدة كان ممكن نصدق أن فيه 10 مليارات دولار استثمارات اجنبية جديدة فى مصر
لكن الى انت عملته انك بعت استثمارات المصريين للأجانب
و بقى كدة يامحيي عايز تلغى نظام تقسيط الشقق وتخلى النظام الأساسى التمويل العقارى علشان الشباب يدفع فائدة 8 و9 % فائدة مركبة غير حق الشقة ومصاريف اجراءات الحصول على التمويل
بصراحة يا محيي أنت مفترى على الشعب
أحمد المغربى
وزير الاسكان فى الشارع
لما الشقة ال100 متر توصل ل500 ألف فى الفترة اللى مسكت فيها الوزارة أكيد فيه حاجة مش مظبوطة
ولما رجل أعمال ياخد أراضى بالفداداين ببلاش علشان يبنى مدينة سكنية الشقة فيها ب800 ألف جنيه برده فيه حاجة مش مظبوطة
ولما أنت تحط سياسة أن يكون اسكان الشباب كله الجديد شقق 60 متر اوضة وصالة علشان تقلل الزيادة السكانية ويطلع عنيهم علشان يعرفوا ياخدوا الشقة وفى الآخر تبيع أراضى بتراب الفلوس علشان يتعمل عليها قصور وفيلل ومدن سياحية يبقى استفزاز صريح للشعب ولا لا
نكتة : المغربى فى بيان صحفى أن أسعار الشقق فى مصر بقت فى متناول الشباب .. السعودى والعراقى والاماراتى
يوسف بطرس غالى
وزير المالية
عارف أنك وزير بقالك كتير .. يمكن من قبل مااتولد كمان
وعلى فكرة انا شفت مكتبك
...... بجد أنت مخلى وزارتك جنة بالذات مكتبك ومكتب المستشاريين بتوعك
ورغم انك طلعت عين الشعب بالضرائب
بس أنا مبسوط منك لأنك أنت اللى فتحت نفس الشعب على الاضرابات
وعلشان كدة هاديك اعفاء مش هاتكلم عن سلبيات تانى
بس كلمة فى ودنك الكبيرة ديه .. أنا عندى احساس انك لو قعدت الحكومة الجاية أكيد هاتدخل التاريخ لأنك هاتكون السبب فى الثورة اللى هاتحصل فى مصر
حبيب العادلى
وزير الداخلية
مرة ظابط شرطة قالى ان الوزير ده لو ماسبش الوزارة والصحفيين بعدوا عنا .. يبقى أحسن يخصخصوا وزارة الداخلية لأننا مش عارفين نشتغل
بس أحييك على الفيلم الرعب اللى عملته لنا يوم الاضراب .. بصراحة كان عرض رائع كنت خايف أتنفس وانا ماشي فى الشارع
وأكيد أثبت قدرتك على كبت الحريات وخنق أى محاولة لانفلات الأمن
بس كنت بسأل نفسى هو لو مصر حصل عليها عدوان هنلاقى فعلا الأمن ده
ونفسى أسالك هو انت ليه شاطر فى تكميم الأفواه ومش عارف تظبط المرور
أنا عندى احساس كبير انك مش هتتغير مع التغيير الوزارى بس لو فعلا كملت فى الوزراة سيبك من حبة المثقفين دولا اللى بيهددوا بالاضراب وظبط لنا المرور الله يخليك لحسن اتخنقنا خلاص
محمد منصور
وزير النقل
مش عارفة أقولك ايه بس انت افتريت على الشعب أوى علشان حرام عليك تحط عبء ارتفاع تذاكر المواصلات كمان على الشعب
رغم ان ده المجال الوحيد اللى بيجيب تكاليفه خلى الاتوبيس المكيف زى ماهو بس حرام عليك اتوبيسات الغلابة تخليها بجنيه وجنيه ونصف
وتخلى متوسط انفاق الاسرة على المواصلات علشان يروحوا الشغل والمدارس والجامعات 10 جنيه فى اليوم
فكر فيها كدة وراجع نفسك
على مصيلحى
وزير التضامن الاجتماعى
أنا آسف لأنى بجد مش بحب أجرح حد بس بجد
أنت اكتر وزير فشلت فى مهمتك لانك اكيد ماكنتش فاهم انت المفروض تعمل ايه اصلا
والدليل على كدة ان الرئيس تدخل شخصيا علشان يشوف حل فى موضوع الطوابير العيش ديه
وكمان ده الرغيف وصل فى عهدك ل50 قرش يا مفترى
أنا لو كنت منك كنت قدمت استقالتى علشان مش كل مرة حد يروح يشترى فيها عيش يدعى عليك
وبالذات لو نام جعان أكيد ربنا مش هيرحمك
وياريت حد يرد عليا يا تري في التعديل الوزاري الجديد
هيكون اية بقي يكون اسوء من كدة ولايمكن تحصل معجزة و يكونوا كويسين
ودة الي مش متوقعة
منقوووووووووووووووووول
بس عجبنى جدااااااااااااااااااااااااااااااااااااااا
موضوع: ياترى مين هى الحكومة الجاية ؟؟؟ 
6/7/2009, 11:35
