ماكياج الشفايف

موضوع: ماكياج الشفايف 14/8/2009, 22:30

النهارده هنعرف مع بعض حاجات كتير عن ماكياج الشفايف

تابعينا
قلم تحديد الشفاه

ماكياج الشفايف Kamar_13

قلم التحديد هو أول حاجة تبدأي بها ماكياج الشفايف، وعلى فكرة قلم التحديد مش موضة أوي الأيام دي، يعني لازم تختاري قلم التحديد من نفس لون الروج وتمزجيه مع أحمر الشفاه علشان يعمل توازن وشكل طبيعي للشفايف، وكمان بيثبت الروج لوقت طويل.

أفضل ماركات أقلام التحديد

بصي يا قمر، قلم التحديد لازم يكون دهني شوية، ويكون طري علشان يكون سهل في الاستخدام، ودي أحسن الماركات اللي ممكن تشتري منها أقلام التحديد "فلوريل" و"مادينا" و"بورجوا".

لو قلم التحديد ناشف

لو لقيتي القلم ناشف شويه ممكن تدفّيه علشان يكون طري معاكي بإنك تقرّبيه من أي لمبة عندك لمدة ثانيتين.

علشان تحددي شفايفك زي المحترفين

ماكياج الشفايف Kamar_14

الطريقة الصحيحة لاستخدام قلم تحديد الشفاه هي إنك تبدأي من منتصف الشفاه السفلى أو العليا، وبعدين تتحركي يمين وشمال. ولازم تاخدي بالك كويس أوي إن خط التحديد اللي من فوق يكون متناسق مع اللي تحت،يعني ما يبقاش واحد كبير وواحد صغير.

وعلشان تدي شكل طبيعي لشفايفك، يبقى لازم تبرزي القوس بتاع الشفايف اللي فوق بشكل دائري مش مسطح. ويا ريت ما تتجاوزيش حدود شفايفك زيادة عن اللزوم لأن ده بيخلي شكل شفايفك مصطنع ومش طبيعي.

كمان لو كانت إيديكي بتترعش وإنتي بتحطي قلم التحديد حاولي تحطي طرف سفنجة تحت شفايفك وإنتي بتحدديها بالقلم، وبكده هتلاقي إن الموضوع سهل جداً، والتحديد مش هينزل تحت الشفايف.

التحديد والتجاعيد

مع التقدم في السن التجاعيد بتبقى أكتر شويه حوالين الشفايف، وعلشان تداري المشكلة دي بالتحديد لازم تستخدمي قلم جاف شويه علشان يمنع تسرب الروج بره الشفايف، وكمان يا ريت ما تحدديش شفايفك بشكل مش مناسب مع تفاصيل وشك، علشان ما يبقاش شكلهم مصطنع ويلفت الانتباه أكثر لانكماش الشفتين.
خلي بالك

فيه حاجتين لازم تاخدي بالك منهم كويس بالنسبة لقلم التحديد..
أول حاجة... لو هتعملي ماكياج شفايفك في مركز تجميل يبقى لازم تخلي الكوافير بتاعك يبري القلم قبل ما يحطه على شفايفك علشان تتأكدي إنه نظيف، وإن ما فيش عليه أي ميكروبات.

تاني حاجة.. خلي دايماً في شنطتك قلم تحديد بلون البيج الطبيعي أو المائل للروز لإن اللونين دول بيتناسبوا مع أي ماكياج وأي لبس وأي مناسبة.

أحمر الشفاه
ماكياج الشفايف Kamar_15

يعتبر أحمر الشفاه من أهم مستحضرات التجميل، وأحسن طريقة علشان تحطي أحمر الشفاه ويكون شكله حلو ومظبوط إنك تستعملي فرشاة صغيرة مسطحة لإنها بتدي درجة عالية من الدقة، وكمان الفرشة بتثبت لون الروج، وممكن تحطي كذا طبقة من نفس اللون علشان يبقى اللون بارز.

أنواع أحمر الشفاه

فيه أنواع كتير من أحمر الشفاه ومنها...

الكريمي... وده بيكون في علبة على شكل كريم، والنوع ده بيشمل مجموعة واسعة من الألوان سهلة الاستخدام، وبيخلي الفم شكله كلاسيكي ورطب.

المط... وده بيستمر فترة أطول من النوع الكريمي؛ بس لازم تختاري نوع كويس، لإن لو نوعه رديء بيكون أصعب في الوضع، وكمان ممكن يتبخر بسرعة ويسيب الصبغة على الشفايف، وده بيسبب جفافها.

الليب جلوس... ممكن تستعمليه لوحده لو عايزة روج خفيف، والنوع ده بيكون لامع أكتر من الروج العادي، وبيتحط بفرشاة صغيرة، وبيتحط بطريقة سهلة وبسيطة.

اختاري اللي يناسبك
ماكياج الشفايف Kamar_19

وإنتي بتعملي ماكياج للشفايف لازم تختاري ألوان مناسبة لك على حسب لون بشرتك يعني لو..
بشرتك شاحبة... لازم تديها إطلالة وإشراقة بإنك تحطي ألوان زي البني أو الأحمر أوالأورانج وتتجنبي الألوان اللي بتكون على مصفرة شوية.

بشرتك روز... يبقى أحسن حاجة ليها النبيتي والبني المحمِر.

بشرتك فاتحة... يبقى أحسن حاجة ليها هي الألوان اللي بتكون على نبيتي أو وردي فاتح زي الموف أو الأحمر اللي على روز.

كمان خلي بالك إنك لو....
أسنانك صفرا... يبقى لازم تتجنبي الألوان اللي فيها درجات الأزرق وكمان الأورانج لإن الألوان دي بتبرز صفار الأسنان، وممكن تحطي البيج بدرجاته.

لماكياج شفايف ثابت

كمان فيه مشكلة، وهو إن الروج بيسيح، وعلشان تتجنبي المشكلة دي ممكن تحطي حوالين شفايفك كريم أساس لون البشرة، وبعدين تحطي بودرة خفيفة قبل ما تحطي الروج وقلم التحديد.

غيّري شكل شفايفك

ممكن تغيري من شكل شفايفك بالماكياج، يعني لو...
شفايفك رفيعة... وعايزة تكبريها ما فيش مشكلة، كل اللي عليكِ إنك تحطي كريم أساس وبودرة على شفايفك كلها، وبعدين ارسمي بقلم التحديد من فوق الخط الطبيعي شوية، وبعدين حطي ألوان فاتحة مع لمسة من الملمّع لإن اللمعة بتدي شكل أكبر للشفايف.
شفايفك عريضة... وعايزه تخلي شكلها أصغر يبقى تستخدمي كريم أساس أغمق درجة من لون بشرتك حوالين شفايفك وبودرة خفيفة، وبعد كده ترسمي قلم التحديد جوه الحدود الطبيعية لشفايفك، ويا ريت تحطي ألوان فاتحة من أحمر الشفاه، وتكون مط لإن اللمعان بيكبر الشفايف زيادة.

وخلي بالك.. إنك ما تكبريش حجم شفايفك بالعرض علشان كده مش بيكون شكله طبيعي.

انفخي شفايفك من غير عمليات تجميل

ماكياج الشفايف Kamar_20

دي فكرة ممكن تجربيها لو عندك سهرة بالليل علشان تستمتعي بشفاه منتفخة وجذابة.
أول حاجة... افتحي شفايفك على آخرها يعني تكون على شكل حرف A.

بعد كده... دخّلي شفايفك لجوه، وحطيهم بين أسنانك واضغطي عليهم جامد.

وبعدين... اعملي شفايفك كإنك بتنطقي حرف O.

وآخر حاجة... مرري ثلجة على شفايفك لمدة دقيقة واحدة.

وبكده هتحصلي على انتفاخ طبيعي مؤقت لشفايفك، وشكلهم هيكون حلو جداً.

عمليات التجميل

فيه ناس بيكون عندها مشاكل في منطقة الشفايف زي التجاعيد وترهلات الجلد اللي بتظهر مع تقدم السن، وعلشان تعالجي المشكلة دي ممكن تعملي عمليات تجميل ومش بتكون صعبة، كل الحكاية إنك بتروحي لدكتور متخصص ويكون شاطر، علشان يعمل لك حقن للمنطقة حول الشفاه، والطريقة دي بتدي للشفايف الاكتناز المناسب بشكل طبيعي.

وبكده يكون خلص كلامنا عن ماكياج الشفايف