يبقى انت اكيد ..... المصرى بجد

]عندما كنت اتصفح احدى المجلات رأيت مقالا اعجبنى واليكم ملخصه :
زى ما بيقول المثل القديم -المصرى هيفضل مصرى - لكن ياترى ياهل ترى مين هو المصرى وازاى تعرف ان
البنى ادم اللى قدامك مصرى من غير ماتشوف بطاقته او جواز سفره الاخضر؟!
واحد من اصحابنا على الانترنت ماكتبش اسمه حاول يجمع شوية صفات من صفات الانسان المصرى واللى هتلاقيه
لوحده من دون البشر فيه الصفات دى .تحبوا تشوفوا معانا وتقولوا رأيكوا هو صح ولا لأ.
بيقولك ياسيدى:
1/المصرى هو اللى بيفهم فى الطب ويشخص المرض وكمان يوصفلك الدوا وبيفهم فى النقاشة والكهربا وتصليح
العربيات والسياسة والكورة وهو ابيض ياورد!!!
2/بيحط الريموت كنترول فى كيس بلاستيك كعادة فرعونية يمكن!
3/الوحيد اللى بيقف يتكلم على الباب نص ساعة بعد انتهاء الزيارة والسلام ويحكى عن كل المواضيع اللى كان لازم يقولها جوه البيت!
4/المصرى دائما بيهول الامور.ويقولك مثلا -انا جيتلك اكتر من 100 مرة امبارح-
5/بيتكلم عن الحرية والديمقراطية ويزعل قوى لو ابنه حب يدخل كلية مش على مزاجه!
6/لو فتحت دواليب المطبخ عنده هتلاقى حوالى عشرين برطمان بتاع مربى فاضى بقالهم سنين ومازال مصر على جمع المزيد منها!
7/هو نفسه اللى بيروح ميعاده بعد ساعتين وبيفتكر ان ده شئ عادى ويخلص شغله اخر عشر دقائق ويذاكر قبل
الامتحان بيوم ولسه عنده اصرار انه يتكلم بصوت عالى فى التليفون لما تكون المكالمة دولية عشان التانى يسمعه؟!
8/المصرى بيعتبر نفسه افضل واحد فى الشراء والفصال وبعد كده يكتشف ان الحاجة نفسها فى المحل اللى
جنبه ارخص من غير فصال.
9/برضه هتلاقى انه بيحتفظ بأكياس محلات الملابس والاحذية وورق الهدايا تحت المرتبة والكارثة انه نادرا جدا
لما بيستخدمها!!
10/ممكن يعدى التلاتين من عمره ولسه عايش مع امه وابوه وما عندهوش مشكلة.
11/تلاقيه قبل الفطار فى رمضان بيشترى مواد استهلاكية موجودة اصلا فى البيت لسه ماستخدمهاش
12/اخونا وحبيبنا المصرى فاكر ان اى حد بيشتغل فى الخليج-بيغرف فلوس-من غير حساب
13/لو عزم حد على العشا بره بيكون مشغول بقيمة البقشيش طول العشا ياترى جنيه ولا نص جنيه
ومع ذلك بيتخانق ساعة دفع الحساب ويصر بحرارة لازم يدفع!
14/المصرى كمان تلاقيه بيفرش ملاية السرير على طقم الانتريه عشان يفضل نضيف قدام الضيوف
ومابيشلهاش لما الضيوف بيحضروا!
15/الاهم من كده انه الوحيد وسط بقية البشر اللى ممكن يقول على بلده-مصر- اى حاجة فى الدنيا انما استحالة
يسمع عنها كلمة وحشة من اى حد ولو حصل ده بيفرش له الملاية!!
حد شاف فرش الملاية ده قبل كده!
ياترى صاحبنا ده عنده حق فى اللى قاله عن المصرى .....كل واحد ورأيه؟]


تحيـــــــــــــــــ عاشق النيل ــــــــــــــــــات