سواق تاكسي لسه مسحوب منه الرخص

عاوزك
تركب مع سواق تاكسي لسه مسحوب منه الرخص , أول ما تشاورلو وتسأله فاضي يا
اسطى, هيرد عليك وهو جايب آخره : بقولك ايه بقى انت هتصدعنا عاوز تركب
اركب , مش عاوز البلد مليانة تكاسي , ثم انت شايف حد معايا ..... لأ ,
يبقى أنا اكيد فاضي ........... قال فاضي يا اسطي قال ........ أنا ايه
إلي خالني أسوق توكوسة ....... أنا اساسا مبحبش التوكوسة ..........
ماتركب يا استاذ انت هتصورني .

- ايه يا عم انت مال ماسورة الكلام عندك مسربة ومطرطشة في كل ناحية كده .

- معلش
يا استاذ , اعذرني الرخص لسه مسحوبة وأنا مش طايق نفسي , اركب بس خليني
أكملك الحكاية في السكة .......... بص يا سيدي أنا ماشي في أمان الله
ولقيت الاشارة أحمر مصفر , طبيعي إني أعدي ......... لكن بعد ما عديت
الاشارة لقيت الظابط بيوقفني ويقولي هات رخصك ........ بذمتك يا استاذ أنا
كده غلطان .

- يعني الاشارة كانت لسه صفرا ؟

- هي مش صفرا قوي , هي الصفار بتاعها كان ابتدا يقلب على احمر .

- يا عم انت جبتلي عمى ألوان ........ وبعدين أنا شايف إن الظابط مغلطش , انت كده كسرت الاشارة .

- يا
عم هي جت عليا , ما كل السواقين بيكسرو الاشارة ....... وأساسا الاشارة
معمولة عندنا عشان نكسرها ............. وبصراحة السواق إلي مابيعرفش يكسر
اشارات ده بيسقط من نظري ....... قال ايه الشارع فاضي والاشارة حمرا وهو
واقف مستني ......... مستني ايه يا حمار ....... لما العسكري يبوس ايدك
ويقولك انت واقف عندك بتعمل ايه .

مش
عارف أقولك ايه ولا ايه يا استاذ , دي بقت عيشة هباب ...... يعني مثلا من
كام يوم لقيت الشكمان بيطلع صوت يحسسك انك راكب طيارة , رحت عند
الميكانيكي قالي الشكمان عنده ثقب في منطقة حساسة وده إلي مأثر على نفسية
الشكمان وبيخليه يطلع الصوت ده , ولازما يتعمله عملية جراحية والثقب ده
يتلحم قبل ما المرض ينتشر وتلاقي الشكمان بتاعك مخرم زي المصفى .وطبعا دفعت أد كده

ولا
الكاوتش بتاع العربية كل شوية ألاقي العجلة نايمة وآجي أركب الفردة
الجديدة ألاقي العجلة إلي جنبها مش عاجبها الحال, قال عاوزة تريح شوية
وتنام زي زميلتها , أصلها مرهقة وتعبانة ........ حتى الكاوتش بقى يبص
لبعضه يا استاذ .............. مفيش فردة كده تحمد ربنا عالعز إلي هي فيه
....... طب انتي منفوخة ومبألظة , ليه تبصي على فردة كاوتش مفسية ومعصعصة .

والطرق
يا استاذ , أجارك الله .......... الطرق دلوقتي بقت تتعمل بالحفر بتاعتها
, وهينزل قانون جديد يحكم المسافة بين كل حفرة وحفرة , وعدد النقر في
السم2 ........... كمان لما تطلع علي المطب كأنك طالع منط 10 متر , و كده
كده بعد الهبوط هتلبس في إلي قدامك , إذا ما رشقتش في عامود نور , أو لقيت
نفسك فوق الرصيف .

و
خلاص دلوقتي مش محتاج أروح معهد الرقص الشرقي عشان اتعلم الرقص , ما خلاص
طول ما أنا آعد في العربية , العربية تترقص مع كل نقرة وحفرة ومع كل طلعة
مطب , دا أنا بفكر أخلي العمود الفقري بتاعي بسوسوته عشان اعرف اترقص كويس
مع العربية .

مش عارف أقولك ايه ولا ايه يا استاذ .............. يا استاذ ............ يا استاذ ..... انت نمت يا استاذ !