شباب وبنات في الكلية

موضوع: شباب وبنات في الكلية 4/11/2007, 01:50

لو قعدت تراقب الولاد والبنات في الكلية هاتلاحظ إن أغلبهم بيتصرف وكأن في كاميرا بتصوّره !!
وانت نفسك تقولّه : يابني مافيش حد واخد باله منك أساساً !

•اللي يشوفها وهي في الكلية وماسكة السندوتش "الميني تويستر" بإديها الليتنين وبتاكل بمنتهى الرقة قطمة قطمة برّاحة وبتخلّص السندوتش في ساعة إلا ربع -وهو أصلاً قد الصباع- مايشوفهاش وهي بتلغوص في حلة المحشي في البيت وبتاكل بمعدّل حداشر صباع في الدقيقة !

•يقولّك : هو ماينفعش أذكر ربنا وأنا في الحمّام ؟
قال يعني الواد حياته كلها ذكر في الشارع وفي الكلية وفي المحاضرات وفي المواصلات وفي البيت وفي الغيط ومافاضلش غير الحمّام !

•تيجي تقوله : على فكرة يا تامر اللي انت بتعمله ده حرام.
يقولك : والله أنا حاولت ومش قادر .... وربنا غفور رحيم
خلاص يا تامر لو أخوك ضايقك ابقى ارميه من البلكونه .... وابوك غفور رحيم , ولو مش مذاكر ماتدخلش الامتحان والدكتور غفور رحيم , ولما تتخانق مع واحد في الشارع اقتله والبوليس غفور رحيم !

•ينده عليها بصوت عالي وهي داخله من باب البيت الساعة 12 بليل : أنا مش قولتلك قبل كده ماتتأخريش مع باكينام لحد نص الليل ؟ طيب ... الخميس اللي جاي مافيش خروج مع باكينام .
لأ حِمِش .... باكينام مين يا عم !!! دا انت اللي باكينام

•ماهيتاب بنت محترمة جدا .... مابتسلمش على ولاد خالص .... ولا حتى على صاحبها !

•يقولك البنت اللي هاتجوزها ماتكونش مشيت مع حد قبل كدة أبدا !
طيب ماهي مشيت معاك يا مغفّل !

•الأب: وانا قدّك يا ولد كنت على طول باطلع الأول على الفصل.
بادام كل الأبّهات كانوا بيطلعوا الأول .... أمال فين الأبّهات الفاشلين اللي كانوا بيطلعوا التاني !

•إنت مش عارف انت بتكلم مين ؟!!!!
في ناس غاوية تقول الجملة دي في كل خناقة
نناشد هؤلاء لسرعة تسجيل أسمائهم في مسابقة الجعجعة الدولية والتي ستقام بحي "الظـيّــاط" شارع "سيد بُــقّـو" ميدان "الفنجري"

•هيثم : شفت يا حمادة اللي حصل !! اليهود ولاد الـ... بيحفروا تحت المسجد الأقصى
حمادة (متألما): أيوه شفت يا هيثم ........ دانا حتى كنت متعكنن امبارح على الآخر وانا باتفرّج على ماتش الزمالك ومزارع دينا.
ربنا يخليك لمصر يا دينا .......... أقصد يا حمادة .

•وائل (بكل رقة وحب) : عارفة يا رانيا ..... أنا بخاف عليكي زي مابخاف على أختي ويمكن أكتر كمان.
جزاك الله خير يا وائل .... وبما إن الجزاء من جنس العمل , ربنا رزق أختك بواحد بيخاف عليها أكتر من أخته برضه.

•مشهد سنة 1970 :
البنت (مطقطقة رأسها خجلاً) : بابا .... لوسمحت ممكن أنزل عند سميرة جارتي اللي تاحتينا أذاكر معاها من فضلك ؟
الأب –أيام ماكان في أبـّــهات- : إنزلي يا حبيبتي وماتتأخريش عن الساعة 8 عشان مايصحّش تفضلي برة البيت أكتر من كده وكمان عشان ماتزعجيش الناس ويعرفوا يناموا.
سنة 1980 :
البنت : بابا ..... ممكن أروح عند زميلتي في الشارع اللي ورانا ؟ كل صاحباتي متجمعين عندها النهاردة .
الأب : أخوكي مش موجود ومافيش حد يوصلك ..... هاتمشي لحد الشارع اللي ورانا لوحدك !!!
سنة 1990 :
البنت : بابي ..... أنا خارجة مع باكينام
الأب : معادك الساعة 9 إوعي تتأخري
سنة 2007 :
البنت : دادي ..... see u soon
الأب: رايحة فين يا شيري كنت عاوز أتكلم معاكي شوية
البنت : دادي ..... كريم مستنيني تحت بالعربية ومستعجل جدا
الأب : يادي كريم ده !!
الأم (تتدخل) : خلاص إنزلي انتي يا شيري دلوقت
(نزلت شيري وهي واخدة على خاطرها من كلام الأب الجارح)
ثم قالت الأم معاتبة للأب : دايما انت كده كاسر خاطر البنت
الأب : هو كريم ده يعني كان خطبها ولا اتكلم عليها ولا شوفنا وشّه حتى !!! وبعدين ده لسه في أولى جامعة !
الأم (بعصبية) : لا ....لا .... لا.... دا انت بقيت رجعي أوي والكلام معاك لا يطاق , أنا رايحة الكوافير .

•مشهد منذ 200 سنة :
عبد الله : باقي شهر على رمضان يا ابراهيم , فكم أنا مشتاق إلى صيام رمضان وقيام رمضان واعتكاف رمضان وليلة القدر في رمضان وصدقة رمضان وإفطار المساكين في رمضان ورحمات الله في رمضان.
مشهد سنة 2007 :
عماد : باقي شهر على رمضان يا هيمه , وَحَشِــتني بقى فوازير رمضان ومسلسلات رمضان والكاميرا الخفية والخيمة الرمضانية........ والخيبة القوية !!

•فُـرِضَت الصلاة في أول الأمر فكانت 50 صلاة , يعني تقريبا كل 20 دقيقة صلاة وانت دلوقت بعد ما ربنا خففهم وبقو خمسة بس وعلى فترات متباعدة كمان....... مش قادر تضرب البطانية برجلك وتقوم تصلي الفجر !!!

• وليد : عاوز أسألك سؤال يا أحمد وجاوبني بمنتهى الصراحة
أحمد : اسأل ..... انت عارف اني طول عمري صريح جدا !
وليد : وعاوزك كمان تفكر في السؤال كويس جدا قبل ماتجاوب
أحمد : يا عم اسأل !!
وليد : لو فتحوا باب الجهاد بكرة الصبح لفلسطين أو العراق مثلاً ...... هاتسيب بيتك والكلية أو الشغل وصحابك وحالك ومحتالك وتروح تجاهد هناك ؟
أحمد (بسرعة) : طبعاً يابني ! ...... دا أنا نفسي في اليوم ده من زمان انت بتتكلم في ايه ؟!!! دا أنا أول واحد هاروح .
المشكلة إن وليد وأحمد مش عارفين إن اللي مش عارف يجاهد نفسه ويلبي حي على الصلاة مش هايعرف يلبي حي على الجهاد !!

• سؤال ذكاء :
- ما وجه الشبه بين الــدِش والــدُش ؟
- اللتنين بيغسلوا الدماغ

•ما هي أفشل الطرق لأي واحد عاوز يبطل سجاير ؟
- عليه بالتدرج من علبتين لعلبة لعشر سجاير لخمسة لتنين لوحدة لعلبتين لعلبة لعشر سجاير لخمسة لتنين لوحدة لعلبتين لـ............................

•نزل ياسر من بيته فوجد سيارته الحديثة مخبوطة.... فحك رأسه وهو يقول في نفسه : غريبة !! ازاي أنزل ألاقي العربية مخبوطة الخبطة الفظيعة دي مع إني أول ماشتريتها حاطيت فيها مصحف على التابلوه !
الغريبة إن ياسر ماسألش نفسه بادام هي دي وظيفة المصحف أمّال ليه نزل من 1400 سنة مع إن ماكانش في عربيات ساعتها ؟!!

•بيعلّموا العيال في المدارس إن الإنسان كان أصله قرد !!!
عشان كده عاوزين يلغوا مادة الدين من المدارس بما إن القرد ليس عليه حساب !

•ما هي الخطوات المتبعة حتى تكون واد هاي لايف ؟
1- بين كل كلمتين احشر أي كلمة انجليزي
2- إوعى تتكلم وسط صحابك في أي موضوع جد,حاول تبقى هايف لأبعد مدى
3- سقّـط البنطلون على قد ماتقدر
4- افتح القميص لحد السرة
5- شعرك نعكشه
6- سدرك انفشه
7- وأخيرا استمتع باشمئزاز الناس من حولك

•الحجاب الأسباني :
تلاقي واحدة بنت ناس من عيلة هاي فاي رابطة ايشارب الشغالة على دماغها ولابسة لبس ضيّـق بألوان متناسقة جدا (مثل البرتقالي مع الأزرق أو كالأصفر مع الأحمر مثلاً) تسألها : إيه يا سالي أبوكي افتقر وانت اشتغلتي في البيوت عشان تصرفي على البيت ؟
تقولك : شغالة إيه يا بيئة ياللي مابتفهامش ..... ده حجاب أسباني يا جاهل !!!
إن شاء الله كام يوم كده وممكن تلاقي سالي قاعدةعلى البحر ولابسة مايوه بيكيني ورابطة شعرها بتوكة !!
إيه التوكة دي يا سالي ؟
سالي : هو انت تاني يا بيئة ياللي مابتفهامش ....... ده حجاب يهودي يا بيئة !!!

موضوع: رد: شباب وبنات في الكلية 4/11/2007, 05:48

موضوع: رد: شباب وبنات في الكلية 4/11/2007, 19:15

تسلم ضحكتك

وشكرا لمرورك

» بنات زمان وبنات اليوم؟؟؟؟؟؟؟
» شاهد أفراح الشعب المصرى ( شباب وبنات وأطفال الكل فرحاااااااااااااااااااااااان بالفوز )
» صورة جماعية لشباب وبنات في دورات المياة
» عناوين ومقر المحاكم الكلية والجزئية والاستئنافية
» شباب أخر زمن