فضفضه شاب اتخنق ((اين عقلى 1 )

موضوع: فضفضه شاب اتخنق ((اين عقلى 1 ) 4/3/2008, 18:45

السلام عليكم ورحمه الله وبركاته

معلش انا عاوز افضفض علشان اتخنقت بقا ياريت الى عاوز يسمعنى يقرا كلامى للاخر وميزهقش من الكلام

فى حاجات كتير بتخنق بس الى لفت نظرى اوى وهى جزء من سياسه كامله متكامله ((الاعلام ))

الاعلام اهم جزء من السياسه بل هو الاداة الاجراميه الاولى المحركه للسياسه الفاشله
ان ليا رائى غريب ومش عارف صح ولا غلط

الاعلام رساله لتوصيل الحقيقه الدفاع عن الحق ومحاربه الشر وهى حلقه التواصل بين الشعب والعالم اجمع يعنى ليها اهميه كبيره جدا جدا

انا حاسس ان السياسه هى الى بتحرك الاعلام

وشايف ان فى سياسه بيتبعها الكبار مع الشعب اسمها سياسه تكبير الصغير وتصغير الكبير او تعظيم الهايف وانكار العظيم
بمسما اخر سياسه الالهاء او التلهيه (( يعنى توجيه وجه نظر الشعب الى اتفه الامور والتركيز الاعلامى عليها وتعويد الشعب على كده )) وتشجيع كبار الدوله لاتفه الامور دى ومساندتها لينساق الملايين نحو التفاهه وتصبح عاده
ويصبح اتفه الناس محط احترام ونظر الجميع ومجال فرحه مصطنعه يدفع ثمنها الشعب اضعاف مضعفه

وسبب هذه السياسه
لكى ينسى الشعب الاموال المهدره والمنهوبه والسرقات والجوع وغلاء الاسعار وانخفاض مستوى المعيشه ويرقص فرحا فى الشوراع لفوز المنتخب ويحتفل بالانجاز التاريخى الذى سيصلح من حال الشعب وحياكلنا ويشربنا ويشغلنا وطبعا الى ورا الانجاز العالمى التاريخى الغير مسبوق فى تاريخ الدنيا الانجاز الذى سيخلده التاريخ هو مكالمات التليفون التى تمت من الكبار ((ده كلام الاعلام )) وذلك بشهاده كل الاعلاميين وكبار القنوات وكل رجال الاعلام الرائع

بس خلاص هما عودونا نفرح اوى لكده ((على مبدء افرح زى مانت عاوز بدام مش حتاخد شلن فى جيبك ))
بس ثمن الفرحه دى انت الى حتدفعو من غير متحس حتدفعو تانى يوم وانت مش واخد بالك لما الاسعار تزيد لما الحال يزداد سؤ لما تتسرق اكتر واكتر وانت بترقص مع الحضرى مهو كله فرحان ومحدش واخد باله

شعب طيب وسياسه زكيه

من كام يوم فى برنامج 90 دقيقه كان بيناقش قضيه فساد الحكومه المصريه وان فى اختلاس لمليارات غير معلومه سبب اهدارها ومليارات اتصرفت على بوكيهات ورد للتعزيه وملايين اتصرفت على انتقالات ومكافاءت الوزراء وده حسب التقرير المعلن من رئيس الجهاز المركزى للمحاسبات السيد جودت الملط على فكره انا حبيت الراجل ده اوى ياريت كلهم كده

الى قال ان الحكومه ليها سلبيات وناقش كل السلبيات والاخطاء والمليارات المختفيه المنهوبه فى تقريه وتم عرضه على مجلس الشعب

الى انا مستغربله ان الاعلام المصرى كانه مش موجود ومشفتش حد بيتكلم او بيفتح بقه ولا حته حد عمل لقاء واحد مع الراجل الى خاف على البلد وقال ان الشعب بيتسرق بالمليارات

على العكس الاعلام كله طنش الموضوع ومجلس الشعب نفسه رفض ادانه الحكومه او مسئلتها حتى مجلس الشعب طلسق على الموضوع وايد الحكومه

وفى حاجه تانيه اخوانا فى فلسطين بيموتو كل يوم ومذابح وقصف واطفال ونساء وويل وعذاب والشهداء بالمئات والاعلام بتاعنا يكتفى بمنشت فى اخر الاخبار ان وجد وانتهت القصه حتى التعاطف والاحساس منعونا منه كتير ميعرفوش ان فى ناس بتموت فى غزه الا لما ابوتريكه رفع شعار تعاطفنا مع عزه بالزمه ده كلام

المهم ان الاعلام بقا لما لاعب كره قدم هرب
الدنيا اتقلبت وكل القنوات الاعلاميه اتقلبت وكل الفضائيات وكبار المسئولين ومصر كلها اتقلبت علشان شخص واحد وبقت مشكله قوميه ههههههههه ولما رجع استقبل استقبال الفاتحين عسل الشعب الطيب ده

انما لما الصحف الدنماركيه اساءت الى الرسول صلى الله عليه وسلم الدنيا متقلبتش ولا كان فى حاجه حصلت ومشفتش برنامج واحد بيناقش الموضوع ده
مشفتش كبار المسئولين بيتصلو على الهوا يستنكرو هذا الاجرام الغير مغتفر او مقبول بالعكس
اراهن ان فى ناس كتير متعرفش اصلا ان الرسول صلى الله عليه وسلم يساء اليه بس يعرفو طبعا ان الحضرى هرب والله حاجه تبكى هو فى ايه يا اخوانا ؟

اعلام ايه ده بس ده احنا فى كارثه اخلاقيه واجتماعيه وفكريه

انا بجد خجلان مفيش مقارنه يا جماعه ده فى انحطاط فى الاخلاق والفكر والاهتمامات

يعنى مش مهم ان الشعب يتسرق ولا مهم ان فى ناس اخواتنا بيموتو وبيتعزبو المهم ان عصام الحضرى يرجع مصر
بجد قرفان اوى قرفان من مستوى الفكر والانحطاط الى بقينا فيه
ده استخفاف بالعقول

ايه يا جماعه الى غير افكار الشعب الى الانحطاط ده بقينا سلبين اوى وبنفرح لاهيف الامور والمصيبه اننا مبقناش بنهتم باهم الامور ومبقاش فى احساس ولا بقلنا رائ بقينا كلنا ماشين جنب الحيط والعقول كل يوم بتزداد ضعف على ضعف

الخلاصه انا شايف ان الاعلام يعتبر عين الشعب الطيب ده بس للاسف الى بيتحكم فى العين هو المخ الفاسد الى بيوجه الاعلام لالهاء الشعب عن حقوقه ومصيره والهاء الشعب فى تفاهات الامور من كوره وفن ومشاركته فى هذه التفاهه والتى اشبه بعمليه تخدير لكى ينسا المريض الالام ولا يطالب بالعلاج واذا تذكر المريض الالمه يبحث عن مخدر جديد (( خبر اعلامى هايف )) وفى الوقت نفسه هناك من يخدع هذا الشعب وياخد ثراوته وخيره تاركا هذا الشعب منهمكا فى هروب الحضرى وتداعياته وتاثيره على مستقبل الامه العربيه وهل يؤدى الى تدهور الحياه فى مصر ام يؤدى الى حرب اهليه
السؤال الصح بقا ياترى فى اثناء ازمه عصام الحضرى اتسرقنا فى كام مليار ؟؟
ياترى التلهيه او الفرقعه القادمه بعد الحضرى حتكون ايه وحيتسرق مننا كام

لو عندنا اعلام صادق يفهم الناس الحق يمكن كنا بقينا احسن من كده
بس الاخطبوط مسيطر على كل اذرعه وبيوجها فى سياسه اجراميه زكيه

دول سرقو عقولنا قبل مايسرقو حقناوفلوسنا

ده مجرد رائ لشاب اتخنق والله اعلم

اسف للاطاله والازعاج