السيمينار ..!

موضوع: السيمينار ..! 16/1/2009, 17:36

تذكير بمساهمة فاتح الموضوع :

السلام عليكم ورحمة الله وبركاته ..
كيفكم احلى اعضاء ..

النهاردة فى فكرة عاوزين نعملها سوا ..
السيمينار ..

السيمينار ما هو الا ساحة حوار كبيرة بتجمع كل ارائنا عن موضوع معين
يعنى زى السبورة البيضاء اللى بنكتب عليها كل اللى حاسينه او شايفين انه بيمثل وجهة نظرنا
ودا طبعا من غير اى قيود.
يعنى ممكن اى حد يقول اللى حاسس بيه ، ممكن كمان اى عضو يرد على اى عضو
او يناقشه برأيه ..

لان الحوار هو اقدر اسلوب على توصيل الافكار والوصول الى رؤيه شبه مكتملة عن موضوع معين
، ولكن اى حوار !؟
فقط الحوار القائم على المناقشة وعرض وجهات النظر ، وليس القائم على الجدال وتصيد الاخطاء ..

هايكون فى موضوع جديد كل يوم اثنين وكل يوم خميس ، ودا مش عشان ان الاثنين اجازة الحلاقين
ولا عشان ان الخميس اخر الاسبوع ويوم حلو ومسمسم ؛ لكن دا عشان هايشارك
فى اختيار الموضوعات دى قسمين المرأة المتربصة المفترية الشرسة والرجل المسكين ، كمان
هايكون فى موضوعات مهمة هاتتعرض فى القسمين كل فترة ..

اتمنى ان الموضوع يكون عجبكم وتكون الفكرة مفيدة لينا كلنا ..

مع ارق امنياتى ،،
فالكون ،،

موضوع: رد: السيمينار ..! 27/1/2009, 03:00

بجد شكرا لكل المشاركين فى السيمينار ..
رايكم اثرى السيمينار جداااا وكمان هو اللى عمل له قيمة حقيقية ..
ويارب نكون كلنا استفدنا من الاراء والموضوعات المطروحة ..
شكرا ..

cxvcx5z

موضوع: رد: السيمينار ..! 27/1/2009, 03:03

الموضوع الرابع ..

مارأيك فى الصداقة بين الشباب والبنات ..!؟
وهل هى وهم أم حقيقة ..!؟

موضوع: رد: السيمينار ..! 27/1/2009, 03:27

انا عاوز اقولك حاجه يافالكون بس ماتزعلش منى

السؤال مش واضح ومش ماشى مع بعضه

زائر

ميرسي فالكون علي الموضوع الرائع دا بجد

مهم جدا بالذات في وقتنا دا

انا رايئ ان كل حاجه في الدنيا لها حدود لو تعدينها تكون غلط حتي لو في اصلها صح

الصداقه بين الولد والبنت لازم تكون في صياق معين متخرجش منه

لازم يكون في احترام متبادل

دا لو محتاجين الصداقه دي بحكم الدراسه الشغل كدا

ولو في بنت تسد يبقي احسن

غير كدا لا اعتقد

موضوع: رد: السيمينار ..! 27/1/2009, 07:07

أكيد حقيقه يا حوده
الصداقة طول عمرها حقيقية بس
بين الولد والبنت مختلفة شوية ف مجتمعنا
لكن زى ما قالت ساره لازم تكون ف حدود
حدود الدين والمجتمع بتاعنا
لكن استغلالها من الطرفين بطريقة غلط الايام دى
بتشوه صورة الصداقة خالص
وطبعا مش هقولك على اللى بيحصل ف الجامعات
انت اكيد عندك خلفيه

ميرسى ليك

موضوع: رد: السيمينار ..! 28/1/2009, 03:33

طبعا منورة سارة السيمينار برأيك وردودك ..
ومهم جدا موضوع الحدود دا لانه بيتحدد على اساسه نظرتنا للصداقة ..
ميرسى على ردك ومرورك سارة ..
وكويس خالص الزملكاوية بيقولوا كلام كويس اهه ..!

موضوع: رد: السيمينار ..! 28/1/2009, 03:35

اهلا ميدو ..
تسلم ميدو على رايك وردك ..
فعلا موضع الصداقة بين الشباب والبنات دا موضوع شائك شوية ..
لان طبعا العلاقة بينهم بيبقى مختلفة ..
نورت يا باشا الموضوع ..

موضوع: رد: السيمينار ..! 28/1/2009, 04:29

ميرسى يا حوده
انا شيفه ان الصداقه بين الولد والبنت ده شىء حقيقى طبعا مش وهمى
وخصوصا فى الوقت ده
ومع ساره ان لازم يكون فى حدود فى التعامل
والى بيتحكم فى الحدود دى البنت مش الولد
بس مش معاها ان البنت تغنى ده بالعكس البنات اوقات بينصحو بعض غلط بدافع الغيره
فانا مع اهميتها بس لازم يكون فى حدود

وبعدين الزمالكويه طول عمرهم بيقولوا كلام كويس
خد بالك.. nooooooooo5

!!!!

زائر

ليه فالكون كدا بس

الزمالك عملت فيك ايه حالا عشان تتكلم عنها بقي

علي العموم

انتا الي جبته لنفسك

موضوع: رد: السيمينار ..! 29/1/2009, 00:57

ميرسى يا حوده
الصداقة البنات ليست امر بسيط

والاساس هى التربية لو ان الامر بسيط بالنسبة للاسرة

لكان الامر شئ عادى للبنات والشباب

لو الامر مرفوض لكان هذا اساس متين لكى تسير البنت على منهاجه

والدين بيأمر بأشياء كثييرة ولكن المطبق منه اشياء قليلة وهذا يرجع الى مدى

تطبيق الاسرة لهذه الاوامر او المنهاج السليم الذى ستسير عليه الاسرة والابناء ..

وطبعا امر الصدقة بين الشاب والبنات شئ سيئ وانا لست مع هذه العادة التى انتشرت مؤخرا

الا فى حدودد الزماله فقط

زائر

برافوا دودو

موضوع: رد: السيمينار ..! 30/1/2009, 04:37

اولا *ازيكم ياحبايبى وحشتونى قوى قوى قوى ووحشتنى المشاركة معاكم جدا

ثانيا بقة ودة الاهم * الموضوع الجميل دة الصداقة بين الشباب والبنات

_______________________________________________

فى ناس مابتعترفش مابتعترفش بالصداقة بين الشباب والبنات واغلبيتها هى اهلينا

بس هى موجودة فى حياتنا واكيد لازم نتعامل معاها وكل واحد وحسب شخصيتة بقة

بس طول مالصداقة بين الولد والبنت مبنية على الاحترام والتقدير اكيد مافيش منها مشاكل

موضوع: رد: السيمينار ..! 30/1/2009, 05:41

الفكرة جميلة اقوى وكمان المواضيع
لو تسمحولى اقول رايى فى موضوع الصداقة دى
فى ظل الظروف اللى احنا بنعشها الصداقة بين الولد والبنت وهم كبير
الولد بعتبرها طريقة يبين منها انة كتير محبوب والبنات حتقطع نفسها علية
لكن فكرة الصداقة بجد دى نادرة اقوى
وانا مع سارة فى ان لوفى صداقة بجد تكون بحدود اخلاقية و دينية

موضوع: رد: السيمينار ..! 30/1/2009, 06:36

اولا *ازيكم ياحبايبى وحشتونى قوى قوى قوى ووحشتنى المشاركة معاكم جدا

واحنا اكتر يا نهى
ياللا نورى تانى
عايزين نشوفك دايما

موضوع: رد: السيمينار ..! 30/1/2009, 14:45

ميرسى دولى على رايك ..
فعلا للبيت اثر كبير قوى فى طبع وتشكيل البنت او الشاب ..
يعنى كتير من العادات او طريقة التفكير بتعتمد بسشكل كبير على الاسس
اللى اخدناها من بيوتنا ..

نورتى دوللى السيمينار ..

موضوع: رد: السيمينار ..! 30/1/2009, 14:54

اهلا نهى ..
كالعادة منورانا يا قمر بوجودك ومشاركاتك ..
انا معاكى ان الصداقة موجودة فعلا فى حياتنا بس ياريت تكون
مبنيه على الاحترام والتقدير ..
لان النظرة للصداقة مش واحدة من كل الاطراف ..

نورتى نهى السيمينار ويارب ماتغيبى عنا ابدا ..

موضوع: رد: السيمينار ..! 30/1/2009, 15:00

اهلا ريو ..
الفكرة اجمل بوجودنا كلنا فيها وانت اولنا ..

ولو ان الصداقة فعلا نادرة بس فى صداقات حقيقية وبتعيش فترات طويله جدا ..
وعلى فكرة مش الولد بس اللى بياخد من بعض صداقاته طريق عشان يبين انه فلانتينو
فى بنات كتير هدفها من صداقاتها كدا بردو واكتر كمان ..

نورتى ريو ..

زائر

الموضوع الخامس

هل ممكن ان تتزوج من علي الرصيف ؟

بمعني

ان ممكن تشوف بنت ماشيه علي الرصيف وتجعبك وتروح تخطبها علي طول ؟

وهل انتي البنت ممكن توافقي علي النوع دا من الجواز ؟

موضوع: رد: السيمينار ..! 30/1/2009, 23:00

شكر كبير جدا يا سارة على مشاركاتك وعلى موضوعاتك المهمة ..
ويارب دايما منورة ..

قال النبى ( صلى الله عليه وسلم ) :
"إياكم وخضراءَ الدِّمَن" فقيل: وما خضراء الدِّمَن؟ قال: "المرأة الحسناء في مَنبَت السُّوء".
"تنكح المرأة لأربع، لمالها، ولحسبها، ولجمالها، و لدينها، فاظفر بذات الدين تربت يداك".

يعنى لااظن انه ينفع يا سارة ان الانسان يرتبط باى انسان كدا وخلاص
لمجرد انه عجبه للحظة او حس بشيء وقتى من ناحيته ..

و اظن ان أفضل الزيجات هو أن يظفر الرجل بإمرأه ذات دين وخلق تتقى الله فيه
اما التسرع فى العلاقات فلا اؤيده اطلاقا ..

ميرسى سارة ..

موضوع: رد: السيمينار ..! 31/1/2009, 01:26

سؤال جميل سارة
انا رايى مثل falcon ماينفعش حد يشوف حد فى الشارع ويعجبة يجرى على طول يطلب ايدها
لازم يعرف اخلاقها شخصيتها تفكرها مايمكن كل دة مايعجبوش ومش يوافق اخلاقة هو
صح ولا اية
انا فى رايى كمان البنت لازم تعرف كل حاجة عن الشخص دة قبل اى شى

زائر

ميرسي فالكون علي رأيك وكلامك الجميل

الموضوع دا انتا الاصل فيه

وبجد كانت فكرة رائعه منك

وميرسي لرأيك في الموضوع بس في فعلا جوازات بتحصل من علي الرصيف

بيبقي في نصيب

سبحان الله

نورت فالكون

زائر

تسلمي رويدا يا قمر علي مرورك وعلي ردك

نورتي التوبيك

بس في بنات بتوافق فعلا انها تتزوج كدا

وممكن تعجب بالشخص ويحصل النصيب في الوقت دا

وتكون زواجه ناجحه عادي

ميرسي يا قمر

موضوع: رد: السيمينار ..! 3/2/2009, 10:36

السلام عليكم ورحمة الله وبركاتة ..

بجد يا جماعة مشاركاتكم منورة السيمينار ..
يارب دايما مع بعض ونكون فى افضل حال ..
و شكر لكل المشاركين ..

موضوع: رد: السيمينار ..! 3/2/2009, 10:40

الموضوع السادس ..

ايه مفهوم الحرية وهل من الممكن انها ترتبط برقابة ..!؟

موضوع: رد: السيمينار ..! 3/2/2009, 10:51

ازيك ياحودة دايما كدة بتجيب موضيع تحفة بس انا مش فاهمة انت تقصد اى نوع من الحرية ولا هو مفتوح ياريت حد يفهمنى

موضوع: رد: السيمينار ..! 4/2/2009, 07:52

ميرسى على موضوعك يا محمود
الحرية هى مسؤلية ف حد ذاتها
بمعنى ان الحرية مش انك تقول اللى انت عايزه
او تعمل اى حاجه انت عايزها بدون تفكير

الحرية ليها مبادئ واهمها احترام الاخرين
وفعلا ف كتير من الاحيان بتكون مرتبطة برقابة
سواء من الاهل او من الزوجة مثلا
بس دى بتدى للواحد مسؤلية
انك حر بس بلاش تعمل حاجه غلط

ميرسى يارب اكون قلت رأي مفيد

موضوع: رد: السيمينار ..! 5/2/2009, 01:54

اهلا نهى ..
كفايه مرورك بس يا نهى دا ينورنى ..
انا اقصد هنا مفهوم الحرية من وجهة نظرك ..
وياترى الحريه دى ممكن تتفق مع الرقابه ولا تتعارض معاها يعنى ..
بس ..

نورتى يا جميل ..

موضوع: رد: السيمينار ..! 5/2/2009, 02:01

فعلا ميدو عندك حق ..
انا بردو شايف ان حدود الحرية الشخصيه بتقف عند حدود حريات الاخرين ..
يعنى الحريه فى حد ذاتها لايمكن تكون مطلقة ..

نورت يا باشا الموضوع ..

زائر

اولا فالكون ميرسي علي الموضوع لانه مهم بجد

بس انتا بتتكلم عن الحريه عامه ودي حاجه كبيره اوي وفروعها كتير

يعني حريه من اي نوع

حريه انك تكون حر في تصرفاتك ومحدش ليه الحق انه يدخل فيها وتعمل الي تحبه في اي وقت من غير قيدوتخرج وتلبس وتعيش حياتك من غير تدخل من اي شخص مهما كان

ولا حريه الفريق الي بتشجعه مثلا

بس عامه انا هقولك رائي في الحريه الي انا اعرفها يعني

الانسان الحر هو الي يعمل الي هو عايزة بس مع مراعاه الظروف الي حوله حتي لو كانت الظروف دي بتقيد حريته لازم برده يرعيها

يراعي قواعد المجتمع ال هو عايش فيه بس مش لدرجه الخنقه الوسط في كل حاجه حلو

اخرج واتفسح واعيش حياتي بش بحدود ولازم انا بين نفسي اكون حطه الموضوع دا اودمي وعارفه عشان الخنقه بس

الموضوع كبير والكلام فيه كتير اوي عايز وقت طويل

بس اظن الي قولته كفايه وياريت يكون رائي وصلك

ويارب تفهم من كلامي حاجه

ميرسي

موضوع: رد: السيمينار ..! 6/2/2009, 15:22

يا هلا سارة ..

رايى ان الحرية هى الحرية كمبدأ ..
لكن اللى بيتغير هى نظرتنا ليها او طريقة تفكيرنا فى معناها او تطبيقها ..
عشان كدا سالت عن الحرية كمفهوم شامل من وجهة نظر كل واحد فينا ..

ميرسى لمرورك وردك يا جميل ..
نورتى الموضوع سارة بجد ..

cxvcx5z

زائر

الموضوع السابع

هل الحب من طرف واحد يعتبر وهم ؟

موضوع: رد: السيمينار ..! 7/2/2009, 04:50

ياااااااااااااانهار جيتى انتى على الوتر
وقعدتى تعزفى يا ساره
موضوع كتير صعب ومؤلم وفظيع
انا بصراحة ربنا مش عارف اقولك
لانى تقريبا جربته
بس اللى اقدر اقولهولك انه فوق الصعب

لى عودة ان شاء الله
وميرسى على موضوعك يا ساره

زائر

الموضوع السابع

هل الحب من طرف واحد وهم ام حقيقه ؟

موضوع: رد: السيمينار ..! 7/2/2009, 20:04

ااااااااااااااااه
بجد عمرك ما تتصورى ذل الحب من طرف واحد
بجد حاجة صعبة اوى فوق ما أى حد يتخيل
و فعلا هو يعتبر وهم لان الواحد بيعلق نفسه بحبل امل مقطوع
مينفعش اصلا
بجد هو وهم كبير جدا و اللى يصدقه بيكون عايش فى عذاب كبير اوى

زائر

ميرسي عرباوي علي رايك وعلي مشاركتك معانا

نورت

موضوع: رد: السيمينار ..! 7/2/2009, 20:30

موضوع مهم جدا ..

رأيى ان الحب من طرف واحد دا وهم طبعا بنمنى بيه نفسنا
الا اذا الحبيب اتقدم واتكلم مع اللى بيحبه حتى عشان يعرف موقفه
من الحب دا ويا ترى ينفع يكملوا ولا تؤ ..
غير كدا يبقى وهم وضياع للعمر كمان ..

ميرسى ارق سارة على الموضوعات الجامدة دى ..

موضوع: رد: السيمينار ..! 8/2/2009, 00:13

هاى سارة حببتى ازيك وحشتينى اليومين دول وكلكم وحشتونى
بس على راىء ميدو وعرباوى الحب من طرف واحد دة شئ فوق ما اى انسان يتخيل فعلا
حاجة مؤلمة بجد انا عن نفسى مجربتهوش بس عشت مع تجارب منة لناس قريبة منى
وشفت اد اية كانوا بيتعزبوا ويتالموا منة
انتى تقدرى تقولى انة فعلا وهم او امنية الانسان بيتمنى يشفها حقيقة قدامة لكن غالبا مابتحصلش
لكن قليلا ماتحدث بس الانسان اللى عايش فيها ياريت انة بنقذ نفسة والخسارة القريبة احسن
المكسب البعيد لان الخساير بعد كدة بتبقة كتيييييييييييرة

زائر

ميرسي حوده علي مرورك ورأيك الرائع

انتا الي منور ومواضيع جباره والله من غير مجامله

موضوع الحب من طرف واحد مهم فعلا

وواضح كدا ان كل الاراء مجتمعه علي انه وهم

بس انا عايزة مشاركات اكتر

ميرسي حوده مره تانيه

وميرسي نهي وانتي كمان وحشاني يا قمر
وميرسي علي رأيك

نورتوااااااااااااااااااا

موضوع: رد: السيمينار ..! 10/2/2009, 02:24

الله الله عليكم بجد ..
ربنا يبارك فى كل الاعضاء ..
ويارب دايما السيمينار مكان ارائنا ويارب دايما يكون مفيد لينا ..
شكر كبير جدا لكل الناس ..
وطبعا شكر خاص للمتوحشة العسولة سارة ..

موضوع: رد: السيمينار ..! 10/2/2009, 02:25

الموضوع الثامن

يا ترى الزوجة الثانية خيانة ولا حل ..!؟

موضوع: رد: السيمينار ..! 10/2/2009, 07:29

هااااااااااااااى ياحوده
بص يا باشا
كل حاجه فى الدنيا دى ليها سبب يبررها فى حد ذاتها
يعن ساعات وجود زوجه تانيه يكون فى مصلحه الزوجه الاولى
لو كان الزوجه الاولى لا تستطيع ملىء حياه زوجها فمن الممكن ان تعوض الزوجه التانيه الرجل بدلا من ان يستغنى عن الاولى كليا

يعنى يا باشا الموضوع كله فى ايد الزوجه الاولى ولو راجل عملها ما يبقاش بيخونها تبقى هيه الى خانت ننفسها

بس فى رجاله ( واطيه)بره القاعده دى

.جوه وبره فرشتلك .وانت مايل وايه يعدلك .

موضوع: رد: السيمينار ..! 11/2/2009, 09:09

هههههههههههههههه ..

بجد مش عارف اقولك ايه على المثل الاخير دا يا يويو ..!

عموما الجواز اصلا ظلم للرجل وغلطة عمرة اللى مسيره هايغلطها فى يوم ..
بس بما ان كل واحد له اربع غلطات يبقى لازم نتكلم فى الموضوع دا ..

ميرسى يارا ..
نورتى يا قمر ..

موضوع: رد: السيمينار ..! 11/2/2009, 09:30

لا اربع غلطات اية انتوا بتتلككوا ومسكنلى فى كلمت الشرع محللنا اربعة

انا مع رائ يارا جدا ان كل حاجة ليها حاجة تبررها ولو فى حاجة الزوجة الاولى مش مكفية
الزوج فيها يبقة يجيب زوجة تانية اوك بس بمعلومية الزوجة الاولى عشان ماتبقاش خيانة
وهى صاحبة القرار تكمل ولا لا

وبرضوا معاكى يايويو جوة وبرة فرشتلك وانت مايل واية يعدلك انتى كدة يابنتى واللة
وماتنساش كمان فالكون ان فى رجالة بتكتفى بالزوجة الاولنية مهما كان فيها من عيوب او عدك تكفية من غير ايديها يعنى وبيكتفوا بنصيبهم
يعنى مش كل الرجالة واطين على رائ يارا برة القاعدة

واللة انتى جتيلى مصلحة يارا حببتى

وميرسى فالكون على مواضيعك السكرة المنورة دية

بس انا لو جوزى جبلة واحدة تانية هموتة واموتة وارمى نفسى من الدور الارضى

السيمينار ..! - صفحة 2 Asola-h-1-1-1

زائر

ميرسي فالكون علي كلامك الجميل

فعلا السيمنار بقي حاجه مهمه

وبيطرح مواضيع مهمه للكل

ميرسي ليكي جدا علي مجهودك الرائع ايها المفتري

اقولك رأيي بقي في سؤالك المره دي

بصراحه في حالات بيكون الزوجه التانيه حل في امور معينه وظروف خاصه جدااااااااااااااا مش علي طول يعني

يعني حل مثلا لما تكون الزوجه الاولي لاتستطيع الانجاب او مشغوله عن الرجل او مثلا تعبانه كدا يعني

لكن غير كدا تبقي حاجه غير مقبول بيها ابدااااااااااااااا

ولا تانيه ولا تالته ولا رابعه

واظن مفيش ست ترضي بالوضع دا

ولا ترضي ان زوجها يكون لزوجه تانيه غيرها

الا في الظروف الي قولتلك عليها مع ان في ناس برده ازواج محترمه بتراعي الظروف دي ومش بتتجوز علي زوجاتهم بس قليل يعني

هيا زوجه واحده فقط والي مش عاجبه ميعملهاش

ميرسي فالكون

موضوع: رد: السيمينار ..! 11/2/2009, 19:00

والله يا حوده موضوع مهم جدا

تسلم مواضيعك وافكارك المتميزه

شوف يا حوده
طبعا دا شرع رب العالمين مش هنقدر نقول حاجة لان كلام ربنا مفيش بعده كلام
ومعلش يا ساره ليا بس تعقيب على كلامك
ربنا قال الراجل يتجوز وحط شرط واحد بس
وهو العدل
احنا مش ينفع نحط اشتراطات تانيه ونقول ان لو الزوجة الاولى مش بتنجب او مشغولة او تعبانه
هو هيقدر يعدل يتجوز يا سوسو وفى ربنا يحاسبه لو مش عدل

طبعا الكلام دا للراجل يا جماعة اللى بيعرف دينه كويس
طبعا هى نفسيا صعبة جداااااااااااااا على الست
بس الاصعب والكارثة ان نقول لربنا لا

مش هنقدر نمنع جواز الراجل من زوجة تانية يا جماعة
لكن اللى تقدر الست تعمله
انها تقوم بواجبتها الزوجية
وتتقى الله فى بيتها وزجها
وهو ان شاء الله مش يحتاج لزوجة تانية

موضوع: رد: السيمينار ..! 12/2/2009, 07:01

ايون ياسارة انا قصدى على كدة فى الظروف دى
وفى ازواج بترضى حتى بالاوضاع دى ومابتتخلاش
او تتزوج مرة اخرى على زوجتها

زائر

انا معاكي فراوله ان العدل هو الشرط الي ربنا وضعه لتعدد الزوجات

بس انا بتكلم عن المجتمع والي بيحصل فيه

طبعا محدش يقدر مينفذش كلام ربنا ولا حتي يعترض عليه

بس لما تكون الزوجه دي عامله كل واجبتها ومفيش اي سبب واضح انه يتجوز عليه غير ان مزاجه كدا

اكيد مش هتقبل الوضع دا
لان فعلا نفسيا هيكون صعب وغير محتمل

موضوع: رد: السيمينار ..! 12/2/2009, 09:10

السلام عليكم ورحمه الله وبركاته

انا عضو جديد هنا فى المنتدى واتمنى انكوا تقبلونى معاكم فى الموضوع الجميل ده

وموضوع النهارده خطير جدا ومحتاج كلام كتير جدا

الزوجه التانيه خيانه ام حل

قبل كل حاجه تعالوا كده الاول نشوف الاسباب اللى تخلى الراجل يفكر فى زوجه تانيه

انا من رائى ان السبب هو الزوجه نفسها

مشكله البنات دلوقتى انهم بيهملوا فى نفسهم بعد الجواز بيفكروا انهم بعد ما يتجوزوا الراجل بيبقى خلاص مفيش وراهم غير البيت ومسئولياته واذا كان فيه اطفال ولا حاجه

وبتهمل تماما الاهتمام بزوجها وبتهمل فى حقه عليها كزوج

بتنسى انه هو كمان المفروض يبقى اول حاجه فى حياتها ويبقى هو اكتر حاجه مهتمه بيها وتحاول تبينله كده

الرسول صلى الله عليه وسلم حث النساء على كده وحثهم انهم يتزينوا لازواجهم لانه ده حق ازواجهم عليهم

وللاسف اغلبيه الزوجات حاليا مش بيعملو مكياج او بيهتموا بمنظرهم الا وهما خارجين بره البيت

وجوه البيت بيبقوا مهملين فى نفسهم جدا

وتعالو نشوف وصيه واحده من وصايا الخنساء لبنتها يوم جوازها

التعهد لموقع عينيه، والتفقد لموضع أنفه، فلا تقع عيناه منك على قبيح، ولا يشم منك إلا أطيب الريح.

وللاسف فيه زوجات كتير بتنسى الكلام ده وبتهمل فى نفسها جدا قدام زوجها

نصيحه منى لكل زوجه او كل بنت مقبله على الجواز

حاولى تخلى الحب رباط قوى ما بينكم وتخلى دايما فيه مابينكم مشاعر واحاسيس جميله وحاولى تغيرى من نفسك يوم بعد يوم

تكونى له الصديقه والحبيبه والام

تملى حياته بيكى

حاولى انك تحسسيه انه كل حياتك علشان انتى كمان تبقى كل حياته

صدقونى لو الراجل شايف انه سعيد مع مراته وان مراته بتعمل كل الحاجات دى علشانه

عمره ما هيفكر انه يتجوز زوجه تانيه

لان العطاء عمره ما هيقابله الا العطاء

والحب عمره ما هيقابله غير الحب

وطالما هو حاسس انك بتحبيه وبتضحى علشانه

عمره ما هيفكر انه يحب غيرك واكيد هيضحى علشانك بحاجات كتير

طول ما بينكم فيه حب واخلاص

عمره ما هيكون فيه خيانه ولا زوجه تانيه

وبالنسبه ليه الزوجه التانيه مش حل

الحل انى لو شايف انى فى مراتى عيب مش عاجبنى

لو بحبها وهى بتحبنى هتحاول انها تصلح العيب ده وانا هساعدها انها تصلح العيب اللى فيها ده

ومش هى بس

اكيد انا كمان هيبقى فيه عيوب لانه مفيش انسان مفيهوش عيوب

كلنا مليانين عيوب

المهم اننا نعرف ايه هى العيوب دى ونحاول نصلحها علشان الحياه تستمر

مش نهرب منها وندور على حلول تانيه

اسف انى طولت عليكم

واتمنى اكون وصلت وجهه نظرى ليكم

شكرا على التوبك الجامد ده

وتقبلوا مرورى

موضوع: رد: السيمينار ..! 12/2/2009, 09:30

فعلا ياسمسم عندك حق
الزوجات هى السبب ساعات فى حدوث كدة

بس المفروض بردة انة يحاول يلفت نظرها بالحسنة قبل مايقبل على اى قرار يكون ظالم ليها

موضوع: رد: السيمينار ..! 12/2/2009, 18:55

اولا ازيكم جميعا طبعااااااااا الموضوع مهم جداااااااا يامحمود
انا فى اعتقادى ان الزوجة التانية بتكون خيانة مهما كان السبب
الا اذا هى اللى دفعته لذلك باهمالها له بس ممكن يعطيها الفرصة
اكتر من مرة علشان بيته واستقرارهم بس لو منفعش واكيد هى الغلطانة
فاكيد هيضطر للزواج
لكن المفروض يكون بعلمها اولا وهى تختار هتستمر معاه ولا لاء
علشان متكونيش خيانة لها وممكن ساعتها ربنا يهديها وتفوق
لكن لو حصل بدون علم حد اكيد هتكون خيانة واصعب شىء على الشخص
الخياانة وخصوصا خيانة الرجل احتراما للجميع
لان الزوج للمراة مش بيكون زوج بس بيكون اخ واب وزوج وحبيب وابن
فاكيد كل ده لما هيروح لحد بيكون خيانة واصعب احساس ياجماعة الخيانة

» قوانين السيمينار ..!