لو عندك فرح ونفسك تخسي في شهر.. جربي ريجيم المناسبات!

ريجيم المناسبات ممكن يتحقق بسهولة..!!
مع الأسف إحنا بنكون عارفين ميعاد المناسبة بس الاستعداد لها كل مرة بيكون في الآخر... عشان الكسل أو الخوف من مواجهة المشكلة، ونقول أكيد ضغط الوقت هيدفعنا نخس، وهو ده الحافز.. بالطبع كل الكلام ده غلط ومضر جداً بالصحة ومخاطرة بصحتنا..
كتير من الشباب وخاصة من المتقدمين لامتحانات الكليات العسكرية بيطلبوا يخسوا 10 و15 كيلو في شهر عشان مستقبلهم في خطر لو فشلوا في الكشف الطبي، وكأنهم اكتشفوا فجأة إن وزنهم في زيادة مستمرة... أو واحدة عاوزة تخس عشان فرحها قرب وخلاص مافيش وقت لازم تخس بأي طريقة عشان تقدر تلبس الفستان.
المريض بيرمي المشكلة ويطلب من الدكتور يتصرف بسرعة..!! دور الدكتور هو تغيير فكر المريض، يعني لو نفسك تخس بجد مش أقل من شهرين ثلاثة عشان تخس صح ووزنك مايرجعش بسرعة مجرد ما تلخبط في الأكل.. العروسة ميعاد فرحها معروف والكشف الطبي كمان، وهنا كل مهمتي مساعدة المريض على اتباع ريجيم صحي قاسي شوية، وأساعده يمشي عليه كويس مع الاستعانة بالدواء المساعد على حرق الدهون وتقليل الشهية.
نصيحتي لو العروسة مستعجلة تخس خمسة كيلو لو مافيش قدامها غير شهر مثلاً... وتثبت وزنها في شهر العسل وبعد كده تخس خمسة كيلو كمان بدل ما تخس عشرة كيلو وتتخنهم بعد الزواج أو في فترة إجازة شهر العسل..


فيه موضة بدأت تظهر اسمها "ريجيم الميه".. إيه رأيك؟!!
ريجيم الميه نوع من الريجيمات القديمة جداً لكن بدأ الناس يتكلموا عنه لما الفنانة الفلانية مشيت عليه وبقت حاجة تانية... أو المجلات الفنية نشرت حاجة عن تأثيره السحري، وكأنه عصا سحرية لمشكلة السمنة...
أولاً مهم نعرف يعني إيه ريجيم الميه... هو نوع من أنواع الصيام ومعروف بأنه دايت منخفض السعرات الحرارية جداً جداً عبارة عن نظام غذائي يعتمد على السوائل مش أقل من 24 لتر ميه في اليوم، وبيدخل فيه سلطة وخضار مسلوق عشان تشغيل الجهاز الهضمي، ومراكز تخسيس كتير بره بتتبعه.

إيه المشكله لو اتبعناه..؟!!
الريجيم ده بيخسس جداً جداً وبسرعة، لكن مشاكله كتير جداً فهو يشكل خطورة على الكبد والكلى، وممكن يعمل حصوات، وله تأثير سلبي خطير على القلب.. صحيح فيه مصحات بتستخدمه في علاج مرضاها، لكن ثبت إنه مضر وكتير من الأطباء توقفوا عن إعطائه بسبب المشاكل اللي بينتج عنها المشي فترة طويلة على ريجيم السوائل.

كتير بنسمع عن ريجيم الفنانات وعن النتائج المبهرة بدون مساعدة؟
لا تخلو بعض أخبار الفنانات من تفاصيل لا علاقة لها بالواقع.. في الوقت اللي بيلجأوا فيه إلى عمليات جراحية منها تحويل المعدة أو تصغير المعدة أو شفط الدهون وغيرها من الجراحات اللي بتفرق كتير في شكل جسمهم؛ نلاقيهم بيأكدوا إن شكلهم اختلف نتيجة لإصرارهم وإرادتهم وفي وقت قصير جداً استطاعوا خسارة وزنهم بدون مساعدة طبيب أو الخضوع لمشرط الجراح.. ربما البعض منهم يخشى أن يعرف عنه إن أجسادهم تحمل علامات وآثار الجراحة.. نصيحتي بلاش نصدق أي حاجة ساعات الناس مش بتقول الحقيقة إزاي خست وفيه ناس بتخاف تقول إنها عملت عمليات لأسباب خاصة... المريض لو ركز في الريجيم بجد هيخس ويكثر من الخضار والفاكهة ويقلل من الدهون والوجبات الجاهزة، ولو عنده إرادة ورغبة حقيقية إنه يخسر وزنه ويكسب صحته...

تسلم ايديكى يا نودى