عــــــــــــزومات رمضــــــان على دودى وبس(29)

عدل سابقا من قبل noody10 في 20/9/2009, 05:28 عدل 20 مرات

تذكير بمساهمة فاتح الموضوع :

العصير
قمر الدين
عــــــــــــزومات رمضــــــان على دودى وبس(29) - صفحة 2 Kamar_031

المقادير:-

• 1/2 لفة قمر الدين مقطعة قطعاً صغيرة
• 1/2 كوب مشمش مجفف
• 1/2 كوب سكر
• 3 أكواب مية
• مكعبات ثلج "اختياري"
الطريقة:-

انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كأسات العصير وضيفي إليه مكعبات الثلج.

طبق الشوربة
شوربة الخضار بالشعرية
عــــــــــــزومات رمضــــــان على دودى وبس(29) - صفحة 2 Kamar_032

فيه بنات كتير مش بتحب إنها تاكل الخضار المطبوخ، ودي حاجة غلط جداً خصوصاً مع الصيام طول النهار...

فإيه رأيك لما تتغلبي على المشكلة دي وتعملي طبق شوربة خضار، وعلى فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار...
المقادير:-

• 1/4 كيلو بسلة
• 1/4 كيلو فاصوليا خضراء
• 2 حبة جزر مقطعة مكعبات متوسطة الحجم
• 2حبة بطاطس مقطعة مكعبات متوسطة الحجم
• 2 حبة كوسا مقطعة مكعبات متوسطة الحجم
• 1/2 كوب شعرية
• معلقتين سمنة
• معلقة ملح وفلفل
• شوربة فراخ أو لحمة
• مكعب مرقة دجاج "اختياري"
• حزمة بقدونس مقطعة قطع صغيرة "للتجميل"
• عصير ليمونة "اختياري"
الطريقة:-

1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.
2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.
3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.

طبق السلطة
سلطة الزبادي
عــــــــــــزومات رمضــــــان على دودى وبس(29) - صفحة 2 Kamar_033

اخترنا لك النهارده طبق سلاطة الزبادي لأن ده أنسب حاجة للطبق الرئيسي اللي هنعمله النهارده ...
المقادير:-

• 3 فصوص ثوم مدقوق
• علبة زبادي
• ورقة نعناع جافّ أو أخضر
• خيارة مقطعة قطع صغيرة جداً أو مفرومة
• معلقة زيت ذرة
• معلقة فلفل أسود + معلقة ملح + معلقة كمون
الطريقة:-
حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع.

الطبق الرئيسي
بط محشي فريك
عــــــــــــزومات رمضــــــان على دودى وبس(29) - صفحة 2 Kamar_034

البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي...
المقادير:-

• 1/2 كيلو فريك
• 1حبة طماطم مقطعة قطع صغيرة جداً
• 2 معلقة كبيرة زبدة
• 3 معالق كبيرة زيت عباد الشمس
• 3 بصلات مقطعة قطع صغيرة
• 3 حبات بطاطس مقطعة قطع صغيرة
• ملح وفلفل وبهارات
• 3 بصلات مقطعة شرائح
• ورق لاورو
• 3 أكواب مية دافية
• 1كوب كبير دقيق
• عصير ليمونة

الطريقة:-
1- هاتي الفريك واغسليه كويس وبعد كده حطيه في المصفاة.
2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي.

3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المتسمر بس خدي بالك إن النار تكون هادية.
4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعد كده حطيها في المصفاة علشان تصفي كل المية اللي فيها.

5- بعد كده هاتي شوكة واغرسي بيها جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك.
6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة.
7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.
8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.
9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.
10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.

طبق الحلو
كنافة بالمكسرات
عــــــــــــزومات رمضــــــان على دودى وبس(29) - صفحة 2 Kamar_035

زي ما قمر الدين والبط المحشي من الأكلات الرئيسية على السفرة المصرية في مصر، كمان طبق الكنافة من الأطباق الرئيسية اللي بتلاقيها موجودة في كل بيت في رمضان، وعلى فكرة الكنافة لها أكتر من طريقة بس النهارده هننتهز فرصة وجود ياميش رمضان ونعمل الكنافة بالمكسرات، وإن شاء الله في الأيام اللي جاية نجيب طرق تانية كتير...

ومش محتاجة إني أفكرك إنك بلاش تعملي أكتر من صنف حلويات كفاية صنف واحد بس وتعمليه على قد أفراد أسراتك أو على قد عدد أفراد العزومة علشان ما فيش حاجة تفيض وتترمي.
المقادير:-

• 1/ 2 كيلو كنافة
• 1/ 4 كوباية زيت ذرة
• 1/ 2 كوباية زبدة أو سمنة
• 1/ 4 كوباية عين جمل أو جوز من غير قشرة
• 1/ 4 لوز من غير قشرة
• 1/ 4 كوباية بندق من غير قشرة
• 1/ 4 كوباية فستق من غير قشرة
• 1/ 2 كوباية زبيب

مقادير الشربات:

• 1/ 2 كوباية سكر
• 3/ 4 كوباية مية
• عصير ليمون
• فانيليا.

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.

طريقة عمل الكنافة:-

1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.
2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها.
3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.
5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.

وبكده تكون خلصت عزومتنا النهارده

وااااااااااو جميل

الله عليكى يا نودى

اكلات تفتح النفس

تسلم ايدك يا قمر

مرسى نورتو
ويارب العزومه تعجبكم

انا كل ما ادخل التوبيك ده بجوع
مليش دعوة هاتيلى حاجه كلها بسرعه بقى

بصراحة حاجه تفتح النفس

انا عاوزه البريانى انا بحبه خالص

بس بجد اكل يجنن

تسلمى يا نودى

تسلم ايدك يانودى

استمرى ياجميله

عزومة 16 رمضان

العصير
عصير الأفوكادو بآيس كريم الفانيليا
عــــــــــــزومات رمضــــــان على دودى وبس(29) - صفحة 2 Kamar_02

المقادير:-

• 3 ثمرات أفوكادو
• 1/2 كوب سكر
• 3 أكواب لبن
• 1/2 كوب آيس كريم فانيليا
• مكعبات تلج
الطريقة:-

قشري الأفوكادو وشيلي منه البذور، بعد كده قطعيه قطع صغيرة، حطي الأفوكادو في الخلاط وضيفي إليه باقي المقادير واضربيهم مع بعض كويس في الخلاط، بعد كده صبي العصير في كاسات العصير وضيفي إليه مكعبات التلج.

طبق الشوربة
شوربة كريمة الفراخ
عــــــــــــزومات رمضــــــان على دودى وبس(29) - صفحة 2 Kamar_06

المقادير:-

• 1/2 كيلو صدور فراخ مخلية ومقطعة قطعا صغيرة
• علبة زبادي
• معلقة نشا
• 3 ملاعق طحينة
• 1/2 كوب زبدة
• جزرة مقطعة قطعا صغيرة
• 1/2 كوب حبوب الذرة (حسب الرغبة) "من السوبر ماركت"
• 1/2 مكعب مرقة الدجاج
• 3 أكواب مية
الطريقة:-

1. اضربي الزبدة السايحة + مرقة الدجاج + الطحينة + النشا + الزبادي + 3 أكواب مية في الخلاط كويس.
2. حطي الخليط على النار لغاية ما يغلي مع التقليب المستمر، وبعد كده ضيفي إليه قطع الدجاج والجزر والذرة وسيبيه على نار هادية لمدة ربع ساعة أو لغاية ما تحسي إن الشوربة بقت ثقيلة ومتجانسة، بعد كده حطيها في أطباق الشوربة وضيفي إليها الفلفل الأسود وقطع التوست المحمر والليمون حسب الرغبة.

طبق السلطة
الثومية
عــــــــــــزومات رمضــــــان على دودى وبس(29) - صفحة 2 Kamar_03

المقادير:-

• 4 فصوص ثوم مفرومين ناعم
• 3 علب زبادي
• 3 معالق مايونيز
• 1/2 حبة بطاطس مسلوقة ومقشرة ومهروسة
الطريقة:-
اخلطي كل المقادير دي مع بعضها البعض وقلبيهم مع بعض كويس وبعد كده حطيهم في طبق السلطة.

الطبق الرئيسي
فتة الفراخ بالزبادي
عــــــــــــزومات رمضــــــان على دودى وبس(29) - صفحة 2 Kamar_05

كلنا طبعا عارفين فتة اللحمة العادية، بس الجديد اللي بنقدمه النهارده هو طبق فتة الفراخ وعلى فكرة الطبق ده شامي.
المقادير:-

• فرخة كاملة
• 3 أكواب أرز
• 5 خبز شامي
• 2 معلقة كبيرة ثوم مدقوق
• 1/3 كوب خل
• زيت عباد الشمس للقلي
• 7 علب زبادي
• 2 معلقة كبيرة سمن بلدي
• 1/2 كوب لوز
• 1/2 كوب صنوبر
• ملح وفلفل

الطريقة:-
1. هاتي الفرخة واغسليها كويس وبعد كده اسلقيها، بعد ما الفرخة تستوي أخليها من العظم والجلد وقطعيها شرائح.

2. هاتي الأرز واغسليه، وبعد كده هاتي حلة وحطي فيها معلقة سمنة ومعلقة زيت وضيفي إليهم الأرز وقلبيه معاهم لمدة خمس دقائق.. بعد كده ضيفي إليه شوربة الفرخة.
3. أثناء ما الأرز بيستوي هاتي الخبز وقطعيه قطع متوسطة الحجم وحمريه في الزيت لغاية ما لونه يبقى دهبي وبعد كده حمصيه في الفرن.
4. سخني معلقة سمن فوق نار خفيفة وضيفي إليها معلقة كبيرة ثوم وقلبيهم مع بعض لغاية ما لون الثوم يبقى دهبي، ضيفي إليه الخل وسيبيه لغاية ما يغلي وبعد كده ضيفي إليه كوب مرقة فراخ وسيبيهم لمدة خمس دقائق على النار.
5. اخلطي الزبادي في طبق مع معلقة خل و1/2 معلقة ثوم وملح وفلفل وقلبيهم مع بعض وبعد كده حطيه في التلاجة.
6. هاتي اللوز واغليه في المية لمدة 1/4 ساعة وبعد كده قشريه وقطعيه إلى قطع صغيرة وحمري اللوز والصنوبر كل على حدة..
7. هاتي طبق زجاجي وحطي فيه الخبز المحمر ومن فوقه حوالي 1/2 كوب من صلصة الخل والثوم وبعد كده حطي الأرز.
8. ضيفي قطع الفراخ إلى المتبقي من صلصة الخل والثوم وسخنيهم مع بعض على نار متوسطة لمدة دقيقة علشان الفراخ تتشرب من الصلصة، بعد كده حطيها فوق الأرز وحطي الزبادي ومن فوقه معلقة سمن ساخنة، ورشي على الطبق من فوق اللوز والصنوبر.

طبق الحلو
بلح الشام
عــــــــــــزومات رمضــــــان على دودى وبس(29) - صفحة 2 Kamar_04

كتير من قرائنا الأعزاء بعتوا لنا وطلبوا أكتر من مرة طريقة عمل بلح الشام علشان كده جبنا لكم الطريقة دي...
المقادير:-

• كوب مية
• كوب دقيق
• معلقة كبيرة زيت أو زبدة
• 3 بيضات
• ذرة ملح
• زيت للتحمير
• شربات
• فانيليا
ودي مقادير شربات بلح الشام:-

• 1/2 كوب سكر
• 3/4 كوب مية
• عصير ليمونة
• فانيليا

طريقة عمل الشربات:-

حطي السكر والمية كلهم مع بعض في إناء على نار هادئة لمدة نص ساعة. بعد كده ضيفي الليمون وسيبيه لمدة ربع ساعة أو لغاية ما تلاقي إنه بدأ يتقل شيليه من على النار وضيفي إليه شوية فانيليا وسيبيه لغاية ما يبرد.
طريقة عمل بلح الشام:-

1. هاتي الدقيق وانخليه وبعد كده ضيفي إليه ذرة الملح.
2. بعد كده هاتي صينية وحطي فيها كوباية المية وضيفي إليها معلقة الزيت أو الزبدة وحطيها على النار، ولما تلاقي المية بدأت في الغليان ضيفي إليها الدقيق دفعة واحدة بس خدي بالك إنك تهدي النار وتقلبي بسرعة الخليط ده كله مع بعضه كويس علشان مايتجمعش العجين ويسيب أثر في الصينية.
3. بعد كده شيليه من على النار وسيبيه لغاية ما يبرد، وبعد كده حطي فيه بيضة وضيفي إليها رشة فانيليا وقلبيهم مع بعض كويس، وبعد كده حطي بيضة تانية وقلبيهم كويس، وحطي بيضة تالتة وقلبيهم كويس لغاية ما تلاقي العجينة لينة.
4. هاتي الصينية اللي هتقلي فيها وحطي فيها كمية كبيرة من الزيت وسخني الزيت، وبعد كده حطي العجينة اللي عندك في القمع المخصص لبلح الشام أو باستخدام ماكينة بلح الشام ولما الزيت يسخن اضغطي على الكيس علشان تنزل منه عجينة بلح الشام، نزلي من الكيس كل مرة عجينة بلح الشام فيه بطول عقلة الصباع، كرري العملية دي لغاية ما تلاقي العجينة خلصت.
5. سيبي بلح الشام في الزيت لغاية ما تلاقي لونه بقى دهبي بعد كده شيليه من على النار وحطيه في مصفاة علشان يتصفى منه الزيت.
6. سيبي بلح الشام لغاية ما يبرد وبعد ما يبرد حطيه في الشربات وبعد خمس دقائق شيليه وحطيه في مصفاة تانية علشان يتصفى منه الشربات، بعد كده حطيه في طبق التقديم ورشي عليه جوز الهند أو أي مكسرات عندك في البيت.

وبكده تكون خلصت عزومتنا النهارده

لا حرام الزل ده

بت يا نودى هاتيلى اكله من دى مره

احنا عمالين نجوع بس كده على الفاضى

عزومة 17 رمضان

العصير
عصير البرتقال بالمانجو
عــــــــــــزومات رمضــــــان على دودى وبس(29) - صفحة 2 4

المقادير:-

• 2 كوب عصير مانجو
• 3 أكواب عصير برتقال
• 1 كوب عصير أناناس
• شرائح برتقال "للتزيين"
• 1/4 كوب سكر
• عصير ليمونة
• مكعبات ثلج
الطريقة:-

اخلطي كل المقادير دي مع بعضها وقلبيها كويس، بعد كده صبيها في كاسات العصير وضيفي إليها مكعبات الثلج وشرائح البرتقال.

طبق الشوربة
شوربة اللحمة بالبروكلي والفاصوليا الخضراء
عــــــــــــزومات رمضــــــان على دودى وبس(29) - صفحة 2 8

المقادير:-

• 1/4 كيلو لحمة مقطعة قطعا صغيرة
• بصلة متوسطة مقطعة قطعا صغيرة
• 1/2 كوب كرفس مقطع قطعا صغيرة
• 1/2 كوب بروكلي مقطع قطعا صغيرة
• 1/2 كوب فاصوليا خضرا
• 1/2 جزرة مقطعة قطعا صغيرة
• معلقة كزبرة خضراء
• معلقة ملح
• رشة بهارات
• معلقة زبد
• كوب مية
الطريقة:-

1. سخني الزيدة وشوحي فيها اللحمة لغاية ما تحمر وبعد كده ضيفي إليها الملح والبهارات والبصل وقلبيهم مع بعض، ضيفي إليهم الخضار والجزر والفاصوليا والبروكلي والكرفس وقلبيهم مع بعض لمدة خمس دقائق.
2. بعد مرور الخمس دقائق ضيفي إليهم المية، وسيبيهم على النار لمدة نص ساعة أو لغاية ما تلاقي أن الخضار واللحمة استوت بعد كده حطي الشوربة في أطباق الشوربة وضيفي إليها الكزبرة الخضراء.

طبق السلطة
السلطة اليونانية
عــــــــــــزومات رمضــــــان على دودى وبس(29) - صفحة 2 7

طبق السلطة اللي معانا النهارده من اليونان مخصوص لكل قراء قمر 14 الأعزاء...

المقادير:-

• 4 حبات طماطم
• 2 حبة خيار
• 1 حبة فلفل أخضر
• 1 بصلة متوسطة
• 1/2 علبة جبنة تلاجة
• 1/2 رابطة خس
• 2/1 كوب زيتون أسود منزوع البذر
• 2 معلقة كبيرة زيت زيتون
• عصير ليمونة
• ملح وفلفل
الطريقة:-
1. قطعي الطماطم إلى قطع طولية وقطعي الخيار والبصل والخس إلى شرائح وقطعي الفلفل الأخضر إلى مربعات وقطعي الجبنة إلى مكعبات صغيرة.
2. حطي الخيار، والطماطم والبصل والفلفل الأخضر، في طبق السلطة وضيفي إليهم الملح والفلفل وعصير الليمون ومعلقة زيت الزيتون وقلبيهم مع بعض.
3. ضيفي إليهم الجبنة والزيتون الأسود ومن فوقهم معلقة زيت الزيتون.

الطبق الرئيسي
لحم بتلو محشي فلفل وجزر
عــــــــــــزومات رمضــــــان على دودى وبس(29) - صفحة 2 5

المقادير:-

• 8 شرائح لحم بتلو
• 1 حبة جزر كبيرة مبشورة
• 1 حبة فلفل أخضر متوسط
• 1/2 كوب زيت ذرة
• ملح وفلفل

الطريقة:-
1. هاتي البصل والفلفل الأخضر وقطعيهم إلى شرائط رفيعة بنفس شكل الجزر المبشور.
2. سخني الزيت في الطاسة وضيفي إليها البصل والجزر والفلفل وقلبيهم مع بعض لمدة 5 دقائق أو لغاية ما تلاقي إن الخضار بدأ يستوي.

3. حطي معلقتين كبيرتين من خليط الخضروات في أحد أطراف شريحة اللحم وبعد كده لفي شريحة اللحمة على الخضروات دي.. كرري نفس العملية مع باقي اللحمة وبعد كده رصيها في صينية للفرن..
4. ضيفي إلى الصينية شوية زيت وحمري فيها لفائف اللحم على نار هادية..
5. لما تلاقي إن اللحمة لونها بقي بني من جميع الجوانب ضيفي إليها 1/2 كوب مية وملح وفلفل وخلّي النار هادية وغطي الصينية وسيبيها لمدة 20 نص ساعة أو لغاية ما اللحمة تستوي وبعد كده رصّيها في طبق التقديم.

طبق الحلو
قطايف بالبلح
عــــــــــــزومات رمضــــــان على دودى وبس(29) - صفحة 2 9

طبق الحلو اللي معانا النهارده هو طبق القطايف المحشوة بلح..
المقادير:-

• كيلو قطايف
• كيلو بلح
• 1 معلقة صغيرة قرفة
• 1/2 كوب زبدة
• 1/2 كوب لوز مبشور
ودي كمان طريقة عمل شربات القطايف.

مقادير الشربات:

• 1/2 كباية سكر
• 3/4 كباية مية
• عصير ليمونة
• فانيليا

طريقة عمل الشربات:-

حطي السكر والمية كلهم مع بعض في إناء على نار هادئة لمدة ربع ساعة.. بعد كده ضيفي الليمون وسيبيه لمدة 5 دقائق لغاية ما يغلي وبعد كده حطي الفانيليا وشيليه من على النار وسيبيه لغاية ما يبرد.

طريقة عمل القطايف:-

1. هاتي البلح وانقعيه لمدة 4 ساعات في المية وبعد كده شيليه من المية وقشريه وشيلي منه النوى وقطعي البلح إلى قطع صغيرة.
2. هاتي طاسة وحطيها على نار هادية ودوبي فيها الزبدة وبعد كده ضيفي إليها البلح وقلبيهم مع بعض كويس، وبعدين رشي القرفة واستمري في التقليب لغاية ما تلاقي إن البلح بدأ يدوب.. هاتي اللوز المبشور وضيفيه إلى البلح واستمري في التقليب لمدة عشر دقائق كمان وبعد كده ارفعي الخليط من على النار وسيبيه لغاية ما يبرد.
3. هاتي القطايف واحشيها بالخليط ده.. وخدي بالك إن الحشو ده يكون في وسط قرص القطايف.. اقفلي قرص القطايف بالضغط عليه بإديكِي، وخدي بالك إنك تتأكدي من عدم وجود أي حشو ظاهر.
4. سخني فرن البوتجاز وهاتي صاج للفرن وادهنيه بشوية زبدة ورصي فيه القطايف وادهني سطح القطايف بالزبدة. ودخليها الفرن لمدة 7 دقائق وبعد كده خرجي الصاج وقلبي القطايف على الوجه الآخر وادهني وشّها بالزيدة ودخليها الفرن مرة كمان لمدة 7 دقائق وبعد ما القطايف وشها يحمر خرجيها وصبي عليها الشربات..

وبكده تكون خلصت عزومتنا النهارده

حرااااااااااااااام
عليكى يانودى
الواحد ماسكه نفسه بالعافيه
ربنا يستر على الشاشه
بس تسلم ايدك ياجميل

مرسى جوجو
نورتى يا جميل

واااااااااااااااو

ايه الجمال ده يبنتى
حرام عليكى جوعتنى وانا لسة فاطرة يبت
هههههههههههههههههههههههههههه
عايزة من البتلو ده يانودى
يلا ياقمر هستنى عزومة بكرة وهحاول اجى بدرى
تسلم ايدك ياسكرة

تسلم ايدك يا نودى
بجد الاكل يفتح النفس

عزومة 18 رمضان

العصير
عصير جريب فروت
عــــــــــــزومات رمضــــــان على دودى وبس(29) - صفحة 2 6

المقادير:-

• عصير نصف حبة جريب فروت
• 2 معلقة كبيرة عسل "اختياري"
• معلقة صغيرة نعناع مفروم
• عصير ليمونة
• مكعبات ثلج
الطريقة:-

أضربي كل المقادير اللي عندك في الخلاط، صبي العصير في كأسات العصير وضيفي إليه مكعبات الثلج.

طبق الشوربة
شوربة لسان العصفور بالجمبري
عــــــــــــزومات رمضــــــان على دودى وبس(29) - صفحة 2 7

المقادير:-

• 1/2 كيلو مكرونة لسان عصفور
• 1/2 كوب زيت ذرة
• بصلة مقطعة قطعا صغيرة جدا
• 3 فصوص ثوم مفروم
• 1/4 كيلو جمبري صغير مقشر
• 2 كوب مية
• 2 ورقة لورو
• عصير أربع ليمونات
• 6 أعواد كرفس مقطع قطعا صغيرة
• بهارات سمك + ملح وفلفل وكمون
• قرن فلفل أحمر مقطع قطعا صغيرة
الطريقة:-

1. هاتي فصوص الثوم وقرن فلفل أحمر مقطع قطعا صغيرة وحطيهم في الهون ومعاهم الملح والكمون والبهارات واطحنيهم كويس مع بعض، بعد كده ضيفي إليهم الليمون وقلبيهم مع بعض.
2. هاتي الجمبري واغسليه كويس وبعد كده رشي عليه الخليط السابق وسيبيه لمدة نص ساعة علشان يتبّل كويس.

3. شوّحي لسان العصفور في الزيت لغاية ما لونه يبقى ذهبي، بعد كده اطفي عنه البوتاجاز.
4. حمّري البصلة والثوم فى زيت الذرة، وبعد كده ضيفى إليهم الجمبري والمية المذاب فيها بهارات السمك.
5. اتركي الخليط في الحلة على النار مع إضافة ورق اللورا وأعواد الكرفس وعصير الليمون لمدة ربع ساعة وبعد كده اطفي البوتاجاز، وقبل أذان المغرب بربع ساعة حطي الشوربة في أطباق الشوربة.

طبق السلطة
سلطة الطحينة بالزبادي
عــــــــــــزومات رمضــــــان على دودى وبس(29) - صفحة 2 8

طبق السلطة ده بقى حلو جدا جدا

المقادير:-

• 1/2 علبة زبادي
• 4 معالق طحينة
• نص حزمة بقدونس مقطعة قطعا صغيرة
• 3 فصوص ثوم مهروسة ناعم
• ملح وفلفل ورشّة بهارات صغيرة
• 3 معالق مية سخنة
الطريقة:-
هاتي طبق السلطة وحطي فيه الطحينة وبعد كده ضيفي إليه المية والزبادي وقلبيهم بالمعلقة كويس، ضيفي إليهم الثوم والملح والفلفل والبهارات والبقدونس واستمري في التقليب لغاية ما تلاقي إن الطحينة بقت سايلة.

الطبق الرئيسي
بطاطس بالجمبري والكلماري
عــــــــــــزومات رمضــــــان على دودى وبس(29) - صفحة 2 4

المقادير:-

• كيلو باذجان رومي
• 1/2 كيلو بطاطس
• بصلة مفروم ناعم
• 5 فصوص ثوم مفروم ناعم
• 1/4 كيلو بروكلي
• زيت زيتون
• ملح و فلفل أسود
• 1/2 كيلو جمبري متوسط الحجم
• خليط من ( الريحان - البصل الأخضر عيدان أو روزماري)
• 1/2 كيلو كلماري مقطع قطعا في حجم الجمبري
• 1/4 كوب جبنة موتزاريلا
• 1/2 كوب خليط من الدقيق والبقسماط
• زيت للتحمير

الطريقة:-
1. هاتي فصوص الثوم وقرن فلفل أحمر مقطع قطعا صغيرة وحطيهم في الهون ومعاهم الملح والكمون والبهارات واطحنيهم كويس مع بعض، وبعد كده ضيفي إليهم الليمون وقلبيهم مع بعض.
2. هاتي الجمبري والكلماري واغسليهم كويس وبعد كده اخلطي كل واحد لوحده بالخلطة اللي إنتِ عملتيها وسيبيهم لمدة نص ساعة علشان يتبّلوا كويس.
3. قطعي الباذنجان والبطاطس إلى مكعبات صغيرة وشوّحيهم مع البروكلي في الزيت لمدة ربع ساعة.
4. حطي شوية زيت زيتون في حلة وحطيهم على النار وبعد كده ضيفي إليهم البصل وقلبيهم مع بعض لمدة عشرة دقائق وبعد كده ضيفي إليهم الثوم وقلبيهم مع بعض على النار لغاية ما لونهم يبقى دهبي ضيفي إليهم الملح الفلفل.
5. بعد كده ضيفي إليهم الجمبري وقلبيهم مع بعض لغاية ما لون الجمبري يبقي برتقالي ضيفي ليه خليط من (الريحان - البصل ألاخضر عيدان أو روزماري).
6. قطعي الكلماري إلى قطع في حجم الجمبري وضيفيه إلى الجمبري وقلبيهم مع بعض لمدة ربع ساعة وبعد كده ضيفي إليهم الباذنجان والبطاطس وقلبيهم على النار لمدة عشرة دقائق.
7. بعد مرور العشر دقائق ضيفي إليهم عصير الطماطم وزيت الزيتون وقلبيهم على النار.. هاتي صينية فرن وحطي فيها كل الحاجات اللي فاتت ورصّي عليها من على الوش الطماطم والجبنة الموتزاريلا ورشي شوية دقيق وبقسماط وزيت الزيتون.
8. شغلي الفرن على درجة حرارة متوسطة ودخلي الصينية فيه لمدة نص ساعة أو لغاية ما وشها يحمر خرجيها وحطيها في أطباق التقديم..

طبق الحلو
سلطة فواكه
عــــــــــــزومات رمضــــــان على دودى وبس(29) - صفحة 2 9

أكيد بعد الوجبة الدسمة دي مش هتقدري تاكلي حلويات؛ فإيه رايك لما تستبدلي النهارده طبق الحلو بطبق سلطة فواكه.
المقادير:-

• 1 حبة تفاح
• 5 حبات برتقال
• 1 حبة كيوي
• 1 حبة كمثرى أو جوافة
• 1 حبة مانجو
• 6 حبات فراولة
• 6حبات عنب أخضر
• 6 حبات عنب أحمر
• عصير ليمونة

الطريقة:-

هاتي البرتقال واعصريه، قطعي التفاح والكيوي والكمثرى والمانجو والبرتقال مكعبات متوسطة الحجم، وقطعي الفراولة بالنصف.. اخلطي كل الحاجات دي مع بعضها وحطيهم في طبق كبير وضيفي إليهم عصير البرتقال وعصير الليمون.

وبكده تكون خلصت عزومتنا النهارده

جيتى فى وقتك يا نووودى حاجات جميلة تسلم ايدك

مرسى يا عاصى نورت
ويارب يكون اكل عجبك

عجبنى الا عجبنى وبس الله يكون فى عونى دلوقتى بعد اما شوفت الاكل ده
هههههههههههههههههههههههههههههههههه

انا بموت فى حاجة اسمها جمبرى اصلا
تسلم ايديكى نوودى
عاوزززين كل يوم كدا حاجة مختلفه

واااااااااااااااااااااااااااااااااااااو

تسلم ايدك

بس ينفع كده كل يوم تجوعينا

حاضر يا عاصى هنوع وهجيب كل الاكل اللى تحبوه
ومالك بس يا بوسى جعانه كده على طول
فينك يا حوده
عــــــــــــزومات رمضــــــان على دودى وبس(29) - صفحة 2 131263

عــــــــــــزومات رمضــــــان على دودى وبس(29) - صفحة 2 131263

نورتونى يا شباب

ايه الجمال ده

انا عاوزه الاكل كله انهرده

الجمبرى شكله يجنن

اصلى بحب الجمبرى جدا يا نودى
وبعدين ما تسيبى حوده ف حاله
حتجبيه ليه حرام عليكى
هو انتى مستخسرى فيا اكل مره من غير ما يقر عليا
عــــــــــــزومات رمضــــــان على دودى وبس(29) - صفحة 2 278182

عــــــــــــزومات رمضــــــان على دودى وبس(29) - صفحة 2 278182

عزومة 19 رمضان

العصير
عصير البطيخ والفراولة
عــــــــــــزومات رمضــــــان على دودى وبس(29) - صفحة 2 3

المقادير:-

• 7 شرائح بطيخ مقطعة مكعبات صغيرة ومنزوع منها اللب.
• كوب كبير مية.
• 1/2 كيلو فراولة مقطعة قطع صغير.
• مكعبات ثلج .
• شرائح ليمون "للتزيين".
• 1/2 كوب سكر.
• 1/4 كوب فراولة مقطعة قطعا صغيرة.
الطريقة:-

أضربي شرائح البطيخ مع الفراولة والسكر والمية في الخلاط كويس، قبل أذان المغرب بربع ساعة صبي العصير في كاسات العصير وضيفي إليه شرائح الليمون وقطع الفراولة ومكعبات الثلج.

طبق الشوربة
شوربة الفلفل الأخضر
عــــــــــــزومات رمضــــــان على دودى وبس(29) - صفحة 2 1

المقادير:-

• 1/2 كيلو فلفل أخضر بارد مقطع قطع متوسطة الحجم
• بصلة كبيرة مقطعة قطع صغيرة
• 5 أكواب شوربة فراخ أو لحمة
• 3 ملاعق كبيرة زيت الزيتون
• ملح وفلفل

الطريقة:-

1. سخّني زيت الزيتون على النار، وضيفي إليه البصلة المقطعة قطعا صغيرة مع التقليب المستمر لغاية ما لون البصلة يبقي دهبي.
2. بعد ما تلاقي إن لون البصلة بقي دهبي ضيفي إليها الفلفل المقطع والشوربة والملح والفلفل وسبيهم على النار لمدة نص ساعة.
3. بعد مرور النص ساعة اطفي البوتجاز، وسيبي الشوربة لغاية ما تبرد، وبعد كده اضربيها في الخلاط لمدة دقيقة، وصفيها بالمصفاة علشان تتخلصي من قشر الفلفل.
4. قبل أذان المغرب بربع ساعة حطي الشوربة على النار، وبعد كده حطيها في أطباق الشوربة.

طبق السلطة
سلطة بطاطس بالزيتون
عــــــــــــزومات رمضــــــان على دودى وبس(29) - صفحة 2 2

المقادير:-

• 4 حبات بطاطس مسلوقة
• كوب زيتون أخضر مقطع شرائح
• كوب زيتون أسود مقطع شرائح
• عصير ليمونة
• معلقة ملح وفلفل
• 1/4 كوب زيت زيتون
• خس مقطع شرائح رفيعة
• 4 حبات خيار مقطعة مكعبات صغيرة
• 3 حبات جزر مقطع مكعبات صغيرة
• 3 حبات طماطم مقطعه مكعبات صغيرة
الطريقة:-
قطعي البطاطس مكعبات واخلطي كل المقادير مع بعضها كويس وتبّليهم بالملح والفلفل والليمون، وبعد كده حطيها في أطباق السلطة.

الطبق الرئيسي
صينية السمك بالبشاميل
عــــــــــــزومات رمضــــــان على دودى وبس(29) - صفحة 2 5

أكيد أول ما تشوفي العنوان ده هتقولي إيه الكلام ده هو معقول فيه حاجة اسمها سمك بالبشاميل؟ هاقول لك آه طبعا في وعلى فكرة الطبق ده مليان بالعناصر الغذائية المفيدة جدا جدا للجسم ..

المقادير:-

• كيلو سمك فيليه
• عصير خمس ليمونات كبيرة
• 1/2 كوب كبير زيت عباد الشمس
• 1/2 كوب كبير زبد
• 1/2 كوب لبن حليب
• 3 معالق صغيرة كمون
• 1/2 كوب مكسرات "عين جمل + جوز مفروم+ لوز"
• ملح و فلفل
• 5 فصوص ثوم مفروم
• قرن شطة حار مقطع مقطع قطع صغيرة
• بيضة مخفوقة بالملح والفلفل
• فنجان جبنه موتزاريلا

الطريقة:-
1. تبلي السمك بالملح والفلفل والكمون وعصير الليمون والثوم وقرن الشطة الأحمر، وقلبيهم مع بعض كويس وسيبيه في الثلاجة لمدة ساعتين علشان يتتبل.
2. اسلقي اللوز لمدة 10 دقائق وبعد كده قشريه وقطعي كل لوزة إلى 4 قطع بالطول وبعد كده حمّصيه في الفرن أو التوستر أو في الزيت.
3. سيّحي الزبدة في حلة متوسطة الحجم وبعد كده، وضيفي إليها الدقيق مع التقليب المستمر لغاية لون الدقيق ما يبقي دهبي.. بعد كده ضيفي اللبن مع التقليب المستمر لغاية ما تلاقي إن الشكل بقى عامل زي الكريمة، وبعد كده ضيفي إليه الملح والفلفل والبهارات وبكده يبقى إنت عملتي البشاميل بعد كده اطفي البوتجاز وسيبيه علشان يبرد .
4. بعد ما البشاميل يبرد ضيفي إليه اللوز وعين الجمل وقلبيهم مع بعض كويس.
5. هاتي صينية فرن وادهنيها بالزيت ورصي فيها شرائح السمك، وبعد كده صبي فوقها البشاميل بالتساوي وبعدين وزعي الجبنة الموتزاريلا على الوش بالتساوي، وممكن أنك ترشي على وش الصينية زيت علشان لما تدخل الفرن تحمر وممكن أنك ترشي على الوش بيضة مخفوقة بالملح والفلفل.
6. سخني الفرن على درجة حرارة متوسطة ودخلي الصينية وسيبيها لمدة ساعة أو لغاية ما وشها يحمر وبعد كده خرجيها .

طبق الحلو
التفاح بالفواكه المجففة
عــــــــــــزومات رمضــــــان على دودى وبس(29) - صفحة 2 4

المقادير:-

• 1 كوب مشمش مجفف
• 1 كوب قراصية منزوعة البذر
• 8 حبات تفاح أصفر متوسط الحجم
• 1/2 كوب عصير ليمون
• كوب زبدة
• 3 معالق كبيرة قرفة
• 1/4 كوب سكر
• 1/2 كوب زبيب

الطريقة:-

1- قطعي المشمش والقراصية إلى قطع متوسطة الحجم وحطيهم في طبق واخلطيهم بالسكر وقلبيهم مع بعض كويس.
2- هاتي التفاح وشيلي قلبه مع الاحتفاظ بالتفاحة كاملة.
3- هاتي عصير الليمون وادهني التفاح من بره ومن جوه باستخدام فرشاة رفيعة.
4- ادهني صينية الفرن بالزبد ورصي فيها التفاح واقفا وحطي جوه كل تفاحة معلقة صغيرة من خليط السكر والمشمش والقراصية ورشي باقي الخليط في الصينية.
5- هاتي الزبدة وقطعيها إلى مربعات وحطيها على التفاح وفي الصينية.
6- سخني الفرن على درجة حرارة متوسطة ودخلي صينية التفاح في الفرن وسيبيها لمدة ربع ساعة أو لغاية ما تلاقي التفاح لونه دهبي طلعيه وحطيه في طبق التقديم.

وبكده تكون خلصت عزومتنا النهارده

تسلم ايدك يا نودى
بس انا مش حاكل حاجه من العزومه دى
انا معزومه انهارده بره

جميل جدااااااااااااااااا
تسلم الايادى

الله ينور تسلم ايدك يانودى

جميل جدا تسلم ايدك

عــــــــــــزومات رمضــــــان على دودى وبس(29) - صفحة 2 251855976

عــــــــــــزومات رمضــــــان على دودى وبس(29) - صفحة 2 187453552

عــــــــــــزومات رمضــــــان على دودى وبس(29) - صفحة 2 407839850

السمك ده شكله يجنن

عاوزه حته منه

وكمان التفاح هوا كل يوم كده هنجوع ونتفرج بس

مش هنتعزم بجد

نورتو ويارب العزومات تعجبكم

الموضوع دة حرام لانة
بيجوعنى وهفضل فكرة طول النهار
ههههههههههههههههههه
تسلم ايدك

تسلم ايدك يانودى ياسكرة

مرسى ونورتو العزومه
عــــــــــــزومات رمضــــــان على دودى وبس(29) - صفحة 2 385486

عزومة 20 رمضان

العصير
الكيوي بالليمون
عــــــــــــزومات رمضــــــان على دودى وبس(29) - صفحة 2 4

المقادير:-

• 4حبات كيوي مقشرة ومقطعة قطعاً صغيرة
• 1/2 كوب عصير ليمون
• 1/2 كوب سكر
• شرائح ليمون أو كيوي "للتزيين"
• 2 كوب ميه
• مكعبات ثلج
الطريقة:-

اخلطي كل المقادير مع بعضها، واضربيها في الخلاط كويس، وبعد كده حطيها في كوبايات العصير، وزيني الكوبايات بشرائح الليمون.

طبق الشوربة
شوربة البطاطس
عــــــــــــزومات رمضــــــان على دودى وبس(29) - صفحة 2 5

المقادير:-

• 3 حبات بطاطس كبيرة الحجم مقطعة قطع صغيرة
• بصلة كبيرة مقطعة قطع صغيرة
• 1/2 كوب زبدة
• 3مكعبات مرقة دجاج مذابة في 3أكواب كبيرة مية أو 3 أكواب شوربة فراخ او لحمة
• علبة قشطة
• ملح + كمون + فلفل
• أوراق بقدونس "للتزين"
الطريقة:-

1. هاتي البصل وقشريه وقطعيه قطعاً صغيرة، وبعد كده حمريه على النار مع الزبدة لمدة خمس دقائق أو لغاية ما تلاقي إن لونه ذهبي.
2. بعد مرور الخمس دقائق ضيفي إليه البطاطس المقطعة قطع صغيرة، وقلبيهم مع بعض لمدة عشرة دقائق.
3. بعد مرور العشر دقائق ضيفي إليها الشوربة والملح والكمون والفلفل وسيبيهم على النار لغاية ما البطاطس تستوي.
4. بعد كده اطفي البوتجاز، وسيبيها لغاية ما تبرد، واضربيها في الخلاط.
5. قبل أذان المغرب بربع ساعة حطيها على النار مرة تانية، وضيفي إليها القشطة مع التقليب المستمر لمدة عشرة دقائق أو لغاية ما تغلي، وبعد كده حطيها في طبق الشوربة وضيفي إليها أوراق البقدونس.

طبق السلطة
سلاطة الباذنجان الرومي
على الطريقة الفرنسية
عــــــــــــزومات رمضــــــان على دودى وبس(29) - صفحة 2 1

بالرغم إن طبق السلاطة اللي معانا النهارده فرنسي إلا إنه بسيط جداً جداً..

المقادير:-

• 3 ثمرات طماطم مقطعة قطعاً صغيرة
• 1 ثمرة باذنجان رومي مقطعة قطعاً صغيرة
• قرن فلفل رومي مقطعاً قطعاً صغيرة
• حزمة بقدونس مقطعة قطعاً صغيرة
• فص ثوم مفروم
• ملح وفلفل
• معلقة مسترده
• كوب زيت للتحمير
الطريقة:-
قطعي الباذنجان مكعبات صغيرة أو شرائح بالطول، واقليه في الزيت، وبعد كده ضيفي إليه باقي المقادير وقلبيهم مع بعض.

الطبق الرئيسي
فراخ على الطريقة اللبنانية
عــــــــــــزومات رمضــــــان على دودى وبس(29) - صفحة 2 2

بنكمل وعدنا اللي وعدناكم بيه، وبنجيب لكم النهارده طبق فراخ على الطريقة اللبنانية.

المقادير:-

• فرخة متوسطة الحجم
• 2 ثمرة طماطم مبشورة
• 2 بصلة مبشورة
• 5 فصوص ثوم مدقوق
• 2 ليمونة مبشورة بالقشر
• 2فلفل رومي مبشور
• حزمة بقدونس مقطعة قطع صغيرة جداً
• ملح- فلفل أسود- بهارات
• 1/4 كوب زيت ذرة

الطريقة:-
1. هاتي الفرخة، واغسليها كويس، وبعد كده اخلطي كل المقادير الباقية مع بعضها البعض، واحشي بيهم قلب الفرخة، وبين الجلد واللحم، ورشي عليها من برة الزيت وسيبها لمدة ساعتين علشان تتبل.
2. بعد مرور الساعتين هاتي صينية فرن وحطي فيها الفرخة ودخليها الفرن لمدة ساعة ونص، أو لغاية ما تستوي وتحمر.
3. بعد كده خرجيها وحطيها في أطباق التقديم، وعلى فكرة ممكن مع الطبق ده تعملي طبق مكرونة بيضاء وتاخدي الصوص بتاع الفرخة تحطيه على المكرونة.

طبق الحلو
تارت التمر والكسترد
عــــــــــــزومات رمضــــــان على دودى وبس(29) - صفحة 2 3

المقادير:-

• 1/2 كوب زبدة
• 1بيضة
• 2 كوب دقيق
• 3معالق كبيرة سكر
• 1/4 كوب تمر مقطعاً قطعاً صغيرة
• 1/3 كوب ميه

الحشو:-
• 1 كوب تمر
• 1 كوب كسترد
• 3 معالق كبيرة سكر بودرة للتزيين
الطريقة:-

1. اخلطي الدقيق مع السكر وقطع التمر وقلبيهم مع بعض كويس، وضيفي إليهم الزبد واعجني الخليط ده مع بعضه بأطراف أصابعك.
2. ضيفي للخليط السابق البيض والمية مع استمرار التقليب لغاية ما تلاقي العجينة بقت لينة، افرديها في القوالب الخاصة بالتارت، ُوغطيها بالكسترد والتمر، وبعد كده حطيها في فرن درجة حرارته 160 درجة مئوية لمدة 20 دقيقة، وبعدين طلعيه من الفرن، وسيبيه لغاية ما يبرد وزينيه بالسكر البودرة.

وبكده تكون خلصت عزومتنا النهارده

ههههههههههههههههههه
حرام عليكى جوعتنى يانودى
ينفع كده ايه بنتى جمال ده
انا بعشق فراخ وطريقتها نهارده تجنن
تسلمى ياسكره

عزومة 21 رمضان

العصير
الطماطم
عــــــــــــزومات رمضــــــان على دودى وبس(29) - صفحة 2 1

المقادير:-

• 1/4 كيلو طماطم مقطعة قطعاً صغيرة
• 1 كوب ميه
• 1/2 كوب سكر
• مكعبات ثلج
الطريقة:-

اخلطي كل المكونات دي مع بعضها، واضربيها في الخلاط، وبعد كده صفيها بالمصفاة، وصبيها في كوبايات العصير.

طبق الشوربة
شوربة القرنبيط بالكريمة
عــــــــــــزومات رمضــــــان على دودى وبس(29) - صفحة 2 3

المقادير:-

• قرنبيط مقطع إلى قطع صغيرة
• 2 بصل أخضر مقطع حلقات
• مكعب مرقة دجاج مذاب في كوب كبيرة مية أو 3 أكواب شوربة فراخ أو لحمة
• 1كوب زبادي
• 4 معالق كبيرة كريمة لباني
• معلقة كبيرة زيت ذرة
• ملح و فلفل وكمون
• بقدونس "للتزيين"
الطريقة:-

1. حمري البصل فى الزيت لغاية ما لونه يبقي ذهبي، وبعد كده ضيفي إليه القرنبيط وشوّحيه معاه على النار لمدة خمس دقائق.
2. بعد مرور الخمس دقائق ضيفي إليه الشوربة والملح والفلفل والكمون، وسيبه على نار هادية لمدة ربع ساعة لغاية ما القرنبيط يستوي بعد ما تلاقي إن القرنبيط استوى اطفي البوتجاز، وسيبه علشان يبرد.
3. بعد ما يبرد اضربيه في الخلاط لغاية ما ينعم، وبعد كده ضيفي إليه الكريمة والزبادي، واضربيهم مع بعض مرة كمان.
4. بعد ما ضربتيهم مع بعض حطي الشوربة في حلة وحطيها علي النار لغاية ما تغلي، وضيفي إليها الملح والفلفل وشويه ميه لو كانت الشوربة سميكة، وبعد كده حطيها في طبق الشوربة.

طبق السلطة
سلاطة التبولة
عــــــــــــزومات رمضــــــان على دودى وبس(29) - صفحة 2 4

المقادير:-

• 3/4 كوب برغل ناعم
• حزمة بقدونس كبيرة
• أوراق نعناع أخضر أو نعناع مجفف
• 4 حبات طماطم
• 2 حبة بصلة
• أوراق خس
• 1/2 كوب زيت زيتون
• 1/2 كوب عصير ليمون
• ملح وفلفل

الطريقة:-
1. اغسلي البرغل كويس كذا مرة، وبعد كده انقعيه لمدة نص ساعة، وصفيه من المية اللي فيه، وضيفي إليه عصير نص ليمونة.
2. اغسلي النعناع والبقدونس وقطعيهم قطعاً صغيرة جداً.
3. اغسلي الطماطم وقطعيها قطعاً صغيرة.

4. هاتي البصل وقطعيه قطعاً صغيرة جداً، وبعد كده ضيفي إليه الملح والفلفل وقلبيهم بالبصل كويس.

5. خلطي البقدونس والنعناع والطماطم والبصل والبرغل. وضيفي إليهم عصير ليمونة وزيت الزيتون ولتجميل طبق السلطة ترصي على الأطراف أوراق الخس.

الطبق الرئيسي
كفتة داود باشا
عــــــــــــزومات رمضــــــان على دودى وبس(29) - صفحة 2 2

المقادير:-

• 1/2 كيلو لحمة مفروم
• بصلة كبيرة مبشور
• 4-5 حبات طماطم
• 1 معلقة كبيرة معجون طماطم
• 1/2 كوب زيت عباد الشمس
• رشة بهارات
• معلقة صغيرة قرفة
• معلقة صغيرة ملح وفلفل

الطريقة:-
1. اخلطي البصل المبشور مع الملح والفلفل والبهارات والقرفة، وبعد كده ضيفي إليهم اللحمة المفرومة وقلبيهم مع بعض كويس، واعملي اللحمة دي على شكل كرات صغيرة في حجم كرة البنج بونج.
2. هاتي طاسة وحطي فيها شوية زيت وسخني الزيت كويس على النار، بعد كده حمري الكفتة في الزيت من جميع الجوانب لمدة 3-4 دقائق. أو ممكن إنك تحطيها في الفرن لغاية ما تستوي.
3. بعد ما تخلصي تحمير الكفتة هاتي الطماطم واضربيها في الخلاط.
4. بعد كده هاتي حلة وحطي فيها حوالي خمس معالق كبار زيت، بعد كده حطي البصلة المفرومة وقلبي كويس لغاية ما لون البصلة يبقى أصفر.
5. ضيفي عصير الطماطم اللي إنتِ عملتيه، وبعد كده ضيفي إليهم معجون الطماطم والملح والفلفل، وسيبيهم على النار لمدة ربع ساعة، وبعد كده ضيفي الكفتة، وسيبيها لمدة ربع ساعة، بعد كده حطيها في طبق التقديم، وممكن معاها تعملي طبق مكرونة بيضاء أو رز أبيض.

طبق الحلو
فطيرة بالمكسرات والفواكه المجففة
عــــــــــــزومات رمضــــــان على دودى وبس(29) - صفحة 2 5

المقادير:-

• 2 كوب دقيق
• كوب كبير زبد مقطع
• 1/2 كوب سكر
• 1 معلقة كبيرة سكر بني
• 2 بيضة
• 2 صفار البيض
• 2 معلقة صغيرة عصير ليمون
• كوب تين مجفف أو قراصيا مقطعة
• 2معلقة كبيرة زبيب
• 2معلقة كبيرة عصير برتقال
• 1معلقة كبيرة قشر برتقال مبشور
• 1معلقة كبيرة مربى تين أو برتقال
• 2معلقة كبيرة عين جمل وجوز
• 1/2 كوب لوز
• 1معلقة صغيرة قرفة
الطريقة:-

1. حطي الدقيق في طبق كبير، وضيفي إليه قطع الزبد واخلطيهم ببعض بإيدك، وبعد كده ضيفي إليهم البيض، والسكر، وصفار بيضة. وقلبيهم مع بعض كويس، وبعد كده ضيفي إليهم عصير الليمون واعجنيهم بإيدك بعد ما تتأكدي إن الخليط ده بقى عجينة متجانسة غطيها بغطاء بلاستيك وحطيها في التلاجة لمدة نص ساعة.
2. حطي التين أو القراصيا في كوباية كبيرة فيها مية مغلية وغطيها لمدة 15 دقيقة، وبعد كده صفيها من المية وقطعيهم لقطع صغيرة. حمصي اللوز وعين الجمل وافرميهم.
3. اخلطي الزبيب، والتين، وعصير البرتقال، وقشر البرتقال، واللوز وعين الجمل، والقرفة والمربى مع بعض.

4. طلعي العجينة من التلاجة وافرديها على سطح مغطى بشوية دقيق؛ بحيث يكون سمكها 1/2 سم. وبعد كده قطعيها إلى دوائر باستخدام فتحة كوباية مستديرة.
5. حطي معلقة صغيرة من الحشو في منتصف كل دائرة. واضغطي على الحواف كويس بإيدك علشان تلزق وتقفل كويس.

6. سخني الفرن على درجة حرارة 180 درجة مئوية. وادهني صينية الفرن بالزبد، ورصي عليها الفطائر. ادهني سطح الفطائر بصفار البيض ورشي فوقها السكر البني، ورصيها في صينية ودخليها الفرن لمدة نص ساعة أو لغاية ما وشها يبقى أحمر وخرجيها.

وبكده تكون خلصت عزومتنا النهارده

تسلم الأيادى يااااااااااااا نووووووووووووووووووودى

واااااااااااااااااو

مش ممكن كدا يا نودى

الاكلات الجامده دى

بس يا ريت تغيريلى عصير الطماطم دا

التبوله شكلها يجنن

عــــــــــــزومات رمضــــــان على دودى وبس(29) - صفحة 2 228155

عــــــــــــزومات رمضــــــان على دودى وبس(29) - صفحة 2 228155

تسلم ايدك يا قمرايه
بجد الاكل شكله تحفه

عــــــــــــزومات رمضــــــان على دودى وبس(29) - صفحة 2 1513

واااااااااااااااااااااااااااو

الاكل شكله يجنن

انا عاوزه اكل اليومين

عشان مجتش امبارح

كفايه يا نودى

مبقتش قادر اقاوم الاكلات الجامده دى

عزومة 22 رمضان

العصير
عصير الموز بالآيس كريم
عــــــــــــزومات رمضــــــان على دودى وبس(29) - صفحة 2 2

المقادير:-

• 1/4 كيلو موز
• كوب آيس كريم بطعم الموز
• 1/2 كوب لبن حليب محلى
• 1 علبة قشطة
• عصير ليمونة
• 2 حبة موز مقطعة شرائح
الطريقة:-

اضربي كل المكونات دي مع بعض في الخلاط، وبعد كده صبيها في كأسات العصير، ممكن إنك تحطي على الوش شرائح من الموز.

طبق الشوربة
شوربة الكوسة
عــــــــــــزومات رمضــــــان على دودى وبس(29) - صفحة 2 3

المقادير:-

• 1/2 كيلو كوسة, مبشورة
• 3 ثمرات جزر مبشورين
• فلفل أحمر مقطع شرائح طويلة
• كوب شوربة فراخ أو لحمة
• بصلة مبشورة
• 1/2 حزمة كسبرة خضراء مفرومة
• معلقة كبيرة زيت ذرة
• ملح وفلفل
الطريقة:-

1. حمري البصل في الزيت لغاية ما لونه يبقى ذهبي، وبعد كده ضيفي إليه الشوربة لغاية ما تغلي.
2. بعد ما تغلي ضيفي إليها الجزر والكوسة والفلفل وسيبيهم مع بعض لمدة 20 دقيقة أو لغاية ما تلاقي إن الخضروات استوت.
3. ضيفي إليها الكسبرة الخضراء والملح والفلفل، وسيبيهم على النار لمدة عشرة دقائق، وبعد كده اطفي البوتجاز وحطي الشوربة في أطباق الشوربة.

طبق السلطة
الباذنجان المخلل
عــــــــــــزومات رمضــــــان على دودى وبس(29) - صفحة 2 5

المقادير:-

• كيلو باذنجان أسود طويل
• 1/2 رأس ثوم مدقوق
• 2حبة فلفل أخضر مقطع قطعاً صغيرة
• 2حبة فلفل أخضر حار مقطع قطعاً صغيرة
• ملعقة كبيرة ملح
• 1 كوب خل
• 3 أكواب ميه
• عصير ليمونة

الطريقة:-
1. هاتي الباذنجان واغسليه كويس واقسميه إلي جزأين، واسلقيه في ميه مضاف إليها الملح لمدة ربع ساعة أو لغاية ما تلاقي إن الباذنجان بقي طري.
2. طلعي الباذنجان من الميه، وحطيه في مصفاة علشان يبرد.
3. افرمي الثوم والفلفل الأخضر والفلفل الحار والبقدونس في الكبة كويس، وبعد كده احشي بيهم قلب الباذنجان وبعد كده رشي عليه عصير الليمون.

الطبق الرئيسي
كباب المأكولات البحرية
عــــــــــــزومات رمضــــــان على دودى وبس(29) - صفحة 2 1

طبعا بنسمع كلام عن كباب الحلة، أو كباب اللحمة؛ بس الجديد اللي هنقدمه النهاردة هو كباب المأكولات البحرية..

المقادير:-

• 1/4 كيلو جمبري متوسط الحجم
• 1/2 كيلو سمك فيليه مقطع مكعبات
• 1/2 كيلو كالاماري" سبيط" بدون الأرجل والرأس
• بصلة كبيرة الحجم
• 1/2 حزمة بقدونس مقطعة قطعاً صغيرة
• 2 معلقة كبيرة ريحان طازج ومفروم
• 5 فصوص ثوم
• 1 معلقة صغيرة كمون
• 1 معلقة صغيرة بهارات السمك
• 1 حبة فلفل أخضر مقطعة مكعبات صغيرة
• 1/2 كوب عصير ليمون
• 1/2 كوب زيت ذرة أو زيت زيتون
• ملح و فلفل

الطريقة:-
1. اخلطي الثوم مع البصل مع الفلفل الأخضر والبقدونس والريحان في الكبة واضربيهم مع بعض كويس، وبعد كده ضيفي إليهم الملح والفلفل والكمون وبهارات السمك وعصير الليمون والزيت وقلبيهم كلهم مع بعض.

2. هاتي الجمبري واغسليه كويس، وبعد كده اغسلي الكالاماري، وقطعيه إلى مكعبات متوسطة الحجم، واغسلي السمك وقطعيه إلى مكعبات، وبعد كده ضيفي إليهم الخليط السابق اللي أنت عملتيه، وقلبيهم مع بعض، وسيبيه لمدة ساعتين علشان السمك والجمبرى والكالاماري يتبل.

3. بعد مرور الساعتين هاتي الأسياخ الخاصة بالشواء اللي عندك سواء المعدنية أو الخشبية، وابدأي في رص الجمبري والكالاماري والسمك فيها؛ بحيث أنها تكون قطعة جمبري قطعة سمك قطعة كالاماري.

4. شغلي الشوايه اللي عندك سواء الفحم أو الكهرباء، وحطي عليها الأسياخ مع مراعاة التقليب من وقت للتاني لغاية ما كل حاجة تستوي.

طبق الحلو
كريب بالشوكولاتة
عــــــــــــزومات رمضــــــان على دودى وبس(29) - صفحة 2 4

المقادير:-

• 1/2 1 كوباية لبن
• 3 أكواب دقيق
• 5 بيضات
• 1/2 معلقة صغيرة فانيليا
• 1/2 فنجان زيت ذرة
• 1/2 فنحان سكر بودرة
مقادير الحشو:-

• كوب شوكولاتة سايحة
• موز مقطع قطعاً صغيرة ورشوش عليه عصير ليمون
• شرائح فراولة
• مربي تين
الطريقة:-

1- اضربي اللبن مع الدقيق بالمضرب، وضيفي إليهم البيض والفانيليا، وقلبيهم مع بعض كويس لغاية ما تلافي العجينة بقت متجانسة.
2- هاتي طاسة تيفال، وحطي فيها نقطة زيت، وحطيها على النار، هاتي مغرفة صغيرة، وحطي عليها شوية من العجينة، وحطيها في الطاسة، وبعد خمس دقائق اقلبيها على الوش التاني علشان العجينة تستوي، استمري على الحال ده لغاية ما كل العجينة اللي عندك تخلص..
3- احشي كل واحدة من الكريب بالشوكولاته وقطع الموز والمربى وشرائح الفراولة، ولفيه على شكل رول ورشي عليها السكر البودرة وصوص الشيكولاتة.

وبكده تكون خلصت عزومتنا النهارده

ايه الزل ده قبل الفطار

انا عاوزه ده

الجمبرى منور

تسلم ايدك يا نونو

عــــــــــــزومات رمضــــــان على دودى وبس(29) - صفحة 2 71512

مرسى يا دوللى نورتى

وياله جربى بقى الحاجات دى

الحمدلله جيت بعد الفطار
لانه على راى دوللى ده زل يبت
بجد تسلمى يانودى
بس عايزين عملى هههههههههههه
تسلمى

ـسلم ايدك نودى
كفايه ده
اه جمبرى

كباب المأكولات البحرية
عــــــــــــزومات رمضــــــان على دودى وبس(29) - صفحة 2 1

انا عاوزه ده
بحبه موت

بصراحه الاكل كله جميل

وبحبه مش هتعزمينا قبل رمضان مايخلص

مرسى نورتونى

ويارب العزومه تكون عجابتكم

الطبق الرئيسي
كباب المأكولات البحرية
عــــــــــــزومات رمضــــــان على دودى وبس(29) - صفحة 2 1

طبق الحلو
كريب بالشوكولاتة
عــــــــــــزومات رمضــــــان على دودى وبس(29) - صفحة 2 4

انا عاوزه دول مش ليا دحوه يا نودى

خدى اللى انتى عيزاه يا بوسى و لا يهمك

» دودى
» مى من طرف دودى
» طلب من دودى
» سياره اغني رجل في العالم ::::::
» ذاكرة دودى